Andreas Uldum: Kommuneqarfik Sermersooq kisimi sinnerlugu naalakkersuisuunngilanga

- Tupaannanngilanga. Quarsaarujussuaqaanga, taamatut oqaatigisariaqarpara. Aammaarlutik Naalakkersuisut naatsorsuutigerpasippaat aningaasaqarnikkut ajornartorsiutigut kommunip ataatsip iluarsivigissagai. Uanga isumaqarpunga Nunatsinni tamarmi taanna ajornartorsiutaasoq, Asii Chemnitz Narup oqarpoq.

Nalimmassaarinissamut aaqqissuussaagallartoq aappaagumit 2018-ip tungaanut atuutilertussaq malillugu, Kommuneqarfik Sermersuup nalimmassaarinermut akiliisarnerata qaavatigut 45 millionit koruuninut ukiuni tulliuttuni pingasuni akiliinerusalissaaq.

Ukiumut 180 millionit koruunit

Nalimmassaarinissamullu aaqqissuussineq 2013-ip tungaanut atuuttumut tamanna sanilliukkaanni, Kommuneqarfik Sermersooq 90 millionit koruuninik ukiumut akiliinerusassaaq, tassalu katillugit 180 millioner koruuninik nalimmassaarinissamut akiliisassalluni.

Kommunimullu tamanna kinguneqapilunissaa, borgemesterip ilimagaa.

- Isumaqarpunga sipaarniarnerput naammassinikuusoq. Kisianni maannakkut soorunami aamma sipaarujussuartariaqassaagut. Oqaatigisinnaanngilarali qanorpiaq, kisianni taanna misissorlugu aallartittariaqarparput, Asii Chemnitz Narup oqarpoq.

Kommunit aningaasatigut unammilligassallit

Nalimmassaarigallarnermi aaqqiissutissatut aalajangiunneqartumi, Kommunit allat aningaasanik amerlanernik pissarsiaqartassapput.

Qaasuitsup Kommunia ukiuni tulliuttuni pingasuni ukiumut 25 millionit koruuninik qaavatigut pissarsiaqartassaaq, Kommune Kujalleq 15 millionit koruuninik taavalu Qeqqata Kommunia 5 millionit koruuninik qaavatigut pissarsiaqartassallutik.

Nalimmaassaarinissamullu aaqqissuussaagallartoq tamanut naleqqunnerpaajusoq aningaasaqarnermut naalakkersuisoq, Andreas Uldum isumaqarpoq.

- Qaasuitsup Kommunia, ilaatigut aamma Kommune Kujalleq aningaasatigut inissisimanera soorunami isiginngitsuusaarsimanngilarput. Taamaammat aamma agguaanneqartut taamatut inissinneqarsimapput, aningaasatigut unammilligassat kommunini taakkunani aamma annertugami, Andreas Uldum oqarpoq.

Nunatsinnut naalakkersuisoq

Taanna Kommuneqarfik Sermersuup kommunalbestyrelsiani ilaasortaagallarnermi, Kommuneqarfik Sermersooq nalimmassaarinissamut 45 millionit koruuninik ukioq kingulleq akiliinerusussanngortinneqarmat, kommunip KANUKOKA-mit ilaasortaajunnaartinneranut isumaqataalluni peqataavoq.

Taassuma eqqaamaqquaa kommunalbestyrelsimut maanna ilaasortaanani Naalakkersuisutut ilaasortaagami.

- Eqqaasississutigissavara, Nunarput tamakkerlugu uanga aningaasaqarnermut naalakkersuisuuvunga. Kommuneqarfik Sermersooq kisiat sinnerlugu naalakkersuisuunngilanga. Taamaammat aalajangerneq una Nunatsinnut tamanut iluaqutaasussatut uanga isigivara, Andreas Uldum oqarpoq.

Nalimmassaarinissamut atajuartussamik aaqqissuussaq Inatsisartut upernaami 2018-mi ataatsimiinneranni saqqummiunneqassangatinneqarpoq, 2019-illu aallartinneranit tamanna atuutilissangatinneqarluni.