Kommune alla kalaallinik angajoqqaanik nalileeriaatsimik oqallisaaqisumik atorunnaarsitsisoq
Esbjergip kommuniata tarnikkut nalilersueriaaseq meeqqanik, kalaallinik angajoqqaaqartunik, pinngitsaaliissummik angerlarsimaffiup avataanut inissiisoqarnissaanut suliani atorneqartartoq atorunnaarsinniarlugu aalajangernikuuaa.
Københavnip kommunia malinnilluni aamma taamaaliorpoq. Københavnimi isumaginnittoqarfik Radio4-mut paasissutissiivoq.
Esbjergip kommuniani innuttaasunut suliffeqarnermullu pisortap, Lise Willerip tusagassiuutitigut oqallinneq malinnaavigineqarsimasoq KNR-imut oqaatigaa.
- Saaffiginnissutit ilisimasallu piffissap ilaani katersorpagut, ilaqutariinnullu susassaqarfimmit nalilersueriaaseq una unitsikkallarniarlugu isumaqatigiippugut, taanna juunip 28-ani oqarpoq.
Institut: Nalilersueriaaseq unitsilli
Danmarkimi Inuit Pisinnaatitaaffii pillugit Institutti, Danmarkimi kommuninut tallimanut tassa Københavnip, Aarhusip, Odensep, Aalborgip Esbjergillu kommuniinut allagaqarnerata kingorna taama aalajangiisoqarpqo. Kalaallit amerlanerpaat kommunini taakkunani najugaqarput. Instituttip allagaqarnermini kalaallit aappariit nalilersorneqartarnerisa atorunnaarsinneqarnissaa kaammattuutigaa.
Instituttip misissuinerit oqaaseqarani ussersornikkut kiinnakkullu isikkulersornikkut oqariartornikkut ersersitsinermik atuinngimmata assigiinngisitsisorai.
Nalilersueriaatsimmi nunani kitaaniittuni najoqqutaasut ileqqullu malillugit suliaavoq, taannalu inunnut allatut kultureqartunut atorneqaraangami paatsuuinermik pilersitsisinnaavoq. Tamanna ilisimasanik siammarterivimmit VIVE-mit nalunaarusiami ilaatigut uparuarneqarpoq.
Tassunga taarsiullugu naalagaaffik kalaallinut angajoqqaanut naleqquttumik nalilersueriaasiliornissamut aningaasanik illuartitsissaaq, taannali qaqugu piariissanersoq ilisimaneqanngilaq.
Nalileeriaaseq atorniakkaa
Københavnip kommunia Isumaginnittoqarfiup Instituttimit allakkamik tigusaqarsimalluni instituttillu innersuussutaa malinniarlugu uppernarsarpaa.
- Isumaginnittoqarfiup kalaallit angajoqqaat piginnaasaannik misissuinermut atatillugu tarnikkut nalilersueriaatsit kulturikkut naleqqussagaanngitsut tunngaviusumik atornianngilai, mailimi allassimavoq.
