Kofoeds Skolep angerlarsimaffeqanngitsut amerliartortut malugigaa: Tamatsinnut eqquisarput
Angut inuit akornanni qasuersaarluni akitsimi nallangavoq, Nuummilu Kofoeds Skolep igaanik qalipaalluni.
Torsuusamilu ungasinngisaani angut alla pattagiarpoq, sulliviillu inunnik juullimut qanittumi niuffannissamut piareersaasunik nuersaasunik, qalipaasunik qisunnillu pilattunik ulikkaarpoq. Sapangaaqqat pinnersasiat, juullimut pinnersaatit puisillu amiinik pooqattat tamarmik atuisartunik sananeqarsimasut Kofoeds Skolep igalaavini saqqummersinneqarput.
Nunatsinni angerlarsimaffeqanngitsut:
- Nunatsinni angerlarsimaffeqanngitsut 491-iuppput.
- Nuna tamakkerlugu angerlarsimaffeqanngitsunik misissuineq illoqarfinni aqqanilinni misissuiffigineqarpoq.
- Inuit 293-it takussaanngitsumik angerlarsimaffeqanngitsutut inuupput. Soorlu innuttaasut unnuisarfinni assigusunilu allani atuisut.
- Inuit 183-it takussaanerusumik angerlarsimaffeqanngitsutu inuupput, taakku silami, najugaqarfiit torsuusaanni, angerlarsimaffeqanngitsut unnuisarfianni, najugaqarfikunik toqqinillu unnuisarput.
- Angerlarsimaffeqanngitsut sinneri 15-it ersarissumik paasissutissartaqanngillat.
- Nalunaarsorneqartut saniatigut allanik aamma angerlarsimaffeqanngitsoqarsinnaasoq nalunaarusiami maluginiaqquneqarpoq aamma.
- Angerlarsimaffeqanngitsunit 356-it angutaapput, 135-t arnaallutik.
- Inuit 30-t 60-illu akornanni ukiullit angerlarsimaffeqanngitsut 343-pput. 18-iniit 29-nik ukiullit 80-iullutik. 60-ileereernikut 68-iullutik.
Paasissutissarsiffik: Kalaallit Nunaanni angerlarsimaffeqanngitsunik kisitsineq 2022
Nutaaliorsinnaaneq Kofoeds Skolemi, Nuummi inuuniarnikkut ajornartorsiuteqartunut sullivimmi takussaavoq. Angerlarsimaffeqanngitsullu ornittagarisinnaasaannik, neriffigisinnaasaannik qasuersarfigisinnaanaannillu pisariaqartitsisoqarpoq.
Nunatsinnimi angerlarsimaffeqanngitsut 491-iusut kisitsinerup nutaap takutippaa. Angerlarsimaffeqanngitsunik kisitsisoqarnissaa Naalakkersuisunit suliakkiissutaavoq, tamannalu Ilisimatusarfimmit ilisimatusartunit eqimattanit suliarineqarpoq.
Tamannalu pisariaqartinneqarsimavoq. Kofoeds Skolemimi forstanderi, Gujo Thorsteinsson aperigaanni nunatsinni angerlarsimaffeqanngitsuuneq ajornartorsiutaavoq annertooq.
- Inunnut taakkununnga ikiuiniarluta sapinngisatsinnik iliuuseqarpugut, taanna oqarpoq.
Ajortut naaffeqanngitsut
Angerlarsimaffeqanngitsunngortartullu angutaanerupput. Angerlarsimaffeqanngitsunik kisitsineq nutaaq naapertorlugu 350-ingajaat angutaapput 130-llu missaat arnaallutik.
Tamanna Kofoeds Skolemi aamma maluginiarneqarpoq.
- Tamanna uppernarsarsinnaavara. Arnat sumiinnersut naluara, arnarpassuimmi aamma angerlarsimaffeqanngitsuupput. Taanna angerlarsimaffeqanngitsuunerup allaanertaraa, Gujo Thorsteinsson oqarpoq, nangillunilu:
- Arnat imminnut isumassornissamut pikkorinnerusarput. Oqaloqatigiissutigineqalaartarpoq… Arlaanni arlaatigut najugassaminnik nassaartarput. Tamanna annerusumik nassuiaaserusunngilara.
AAMMA ATUARUK Angerlarsimaffeqanngitsunik misissueqataasoq: Nakkaaterujussuarsinnaasarput
Pingaartumik kingunerlutsitsineq atornerluisuunerlu angerlarsimaffeqanngitsut akornanni ajornartorsiutaapput naaffeqanngitsut, Gujo Thorsteinsson oqarpoq.
Taamaammat inuiaqatigiit siuttuinit iliuuseqartoqapallannissaa pingaaruteqartoq, forstanderi isumaqarpoq.
- Tamatsinnut eqquisarput. Nalunngilarput angerlarsimaffeqanngitsut inuunerminnik annaasaqarnissaa aarlerinarnerusartoq. Nammineq taamaaliortoqarsinnaavoq imaluunniit arlaannik eqqugaasinnaapput. Inuunerisap inuuffiginissaa pitsaavallaanngilaq.
Angerlarsimaffeqanngitsuuneq politikkikkut pingaarnersiorneqartarsoraajuk?
- Imatorujussuunngitsoq. Maanna annerusumik ukkatarineqarpoq, nalunaarusiortoqarlunimi kisitsisinik allanillu saqqummertoqarpoq. Tamanna ajunngilaq. Kisianni juulli qaangiuppat, nerilluataareeruttalu iliuuseqartoqassasoq neriussaanga, Gujo Thorsteinsson oqarpoq.
Nuup aqquserngani
Angerlarsimaffeqanngitsunik kisitsineq naapertorlugu angerlarsimaffeqanngitsut amerlanerit Nuummiipput.
Naak angerlarsimaffeqanngitsunik kisitsinerup nunatsinni angerlarsimaffeqanngitsut 491-iusut inerniliissutigereeraluarai, tamanna Kommuneqarfik Sermersuumi allaaneruvoq.
Kommunip nittartagaa misissoraanni Kommuneqarfik Sermersuumi angerlarsimaffeqanngitsut 460-it missaanniittut allassimavoq.
AAMMA ATUARUK Ilisimatuut paasisaat: Inuit 500-t missaanniittut angerlarsimaffeqanngillat
Kommuneqarfik Sermersuullu angerlarsimaffeqanngitsunik missingersuusiorneranit taakku ikilisimappata taava tamanna ajunngitsoq, Gujo Thorsteinsson oqarpoq:
- Kisianni tamanna malugisimanagu oqaatigissavara. Ikiartulersimappatali nuannaassaanga.
Gujo Thorstensson Kofoeds Skolemi ukiuni arfineq-marlunni aqutsisuuvoq, taassumalu angerlarsimaffeqanngitsut amerliartornerat malugisinnaavaa.
Inissiat qulakkeerneqassasut
Naalakkersuisut angerlarsimaffeqanngitsunut inissianik nutarterinissamut aningaasaliisimasut, isumaginninnermut naalakkersuisup, Jess Svanep KNR-imut oktobarip naanerani oqaatigaa.
Tamanna Kommuneqarfik Sermersuup suleqatigineratigut pivoq.
Tamatuma saniatigut taakkununnga iliuusissatut pilersaarusiortoqassasoq, Jess Svane isumaqarpoq.
Nalinginnaasumik iliuusissanik pilersaarusiorneq siulliunneqartaraluarpoq, taanna isumaginnittoqarfimmit tunniunneqartarpoq.
- Sulileriaannaat imaluunniit ingerlaqqeriaannaasutullu isigisagut siulliullugit inimut isertissavagut. Tassanngaanniillu angerlarsimaffeqartilereerutsigit taava iliuusissamik pilersaarusioqatigissavagut, immaqa alloriaqqinnissaannut arlaatigut suleqatigalugit.
