Kofod Issittumi oqallittarfeqalernissaanut nangaasoq mattussinngitsorli
Issittumi Siunnersuisooqatigiit, Arktisk Fem, Arctic Eight (A8) Arctic Coast Guad Forum.
Inuiaat, innuttaasunit eqimattat suliniaqatigiiffiillu Issittumiittut siunnersuisooqatigiiffii amerlapput. Issittumili nunat akornanni oqalliffimmik nutaamik pilersitsinissamut pissutissaqarpoq.
Naalagaaffeqatigiit Issittumi unammillernartitaannik periarfissaannillu ilisimatuut misissueqqissaarnerat ataasinngornermi saqqummersinneqartoq ilaatigut taama siunnersuuteqarpoq.
Oqallittarfik nutaaq ilisimatuut oqarnerat naapertorlugu nunanut peqatigiiffinnullu Issittumi toqqaannartumik angerlarsimaffeqanngitsunut ilaatitsissanngilaq. Oqallittarfimmi sammisat angisuut ilaatigut sakkutooqarnermut sillimaniarnermullu tunngasut ammasumik oqallisigineqarsinnaassapput.
AAMMA ATUARUK USA-p Nuummi sinniisoqarfissaa sapaatip-akunnerata tulliani ammassasoq
Danskilli nunanut allanut tunngasunut ministeriat, Jeppe Kofod (S) oqallittarfeqalernissamut siunnersuut pillugu toqqaannartumik aperineqarami erseqqissumik ’angernianngilaq’.
- Oqallittarfimmik siunissami pilersitsinissaq itigartereernianngilara. Nunarsuarmili sillimaniarnikkut taama unammillernartoqartillugu peqatigisagullu, tassa USA, aamma Canada Norgelu ilanngullugit sillimaniarnikkut qanoq aaqqiissuteqartarnissatta misissornissaa aamma pingaaruteqarpoq, taanna KNR-imut oqarpoq.
Issittumi Siunnersuisooqatigiit, Arctic Five, Arctic Eight allallu oqallittarfiit pioreersut assigiinnanngilaat?
- Aap, oqartoqarsinnaavormi assersuutigalugu Issittumi Siunnersuisooqatigiinni - sillimaniarnermut politikki ilaatinneqanngikkaluarpalluunniit - ataatsimut suliaqarneq Issittumi isumannaassusermik pilersitseqataasarpoq. Aamma imaatigut annaassiniarnernik allanillu issittup sineriaani naalagaaffiit pingaaruteqartunik suleqatigiittarput, Jeppe Kofod oqarpoq.
Taassumali misissueqqissaarnermi innersuussutit tamarmik naalagaaffeqatigiinni ammasumik oqallisigineqarnissaat kissaatigaa.
Ilisimatooq: Ruslandip suleqatiginera mikisualunni aallartissasoq
Misissueqqissaarnermi ilisimatuut oqarnerat naapertorlugu Issittumi eqqissisimasoqaannarnissaanut Ruslandip naalagaaffiillu allat qanimut oqallisigeqatigisalernissaat pingaaruteqarpoq.
Ruslandimut atassuteqarneq 2014-imi russit sakkutuuisa Ukrainimi qeqertaasaq Krim tiguarmassulli ingerlanerliulerpoq.
Tassanilu nunat matumani Danmark ilanngullugu Ruslandimut nunanut allanut attaveqaatinik mattussipput. Aamma Krim pillugu aaqqiagiinngittoqalerneraniilli Issittumi Siunnersuisooqatigiinni qullersat peqataaffigisaannik ataatsimiittarnerit unipput.
AAMMA ATUARUK Venstrep Issittumut oqaaseqartartortaava: Issittoq eqqissisimanartuujunnaarpoq
Ruslandilli issittumi nunat Issittumi sillimaniarneq pillugu oqallinneranni ataatsimeeqataasaleqqinnissaa pingaaruteqarpoq.
Misissueqqissaarnermi allaatiginneqataasut ilaat, Steen Kjærgaard oqarpoq. Taanna ulluinnarni sakkutooqarnikkut misissueqqissaartartuullunilu Københavnimi Illersornissaq pillugu ilinniarfimmi Center for Arktiske Sikkerhedsstudierimi pisortaavoq.
- Ruslandimut oqallittarnermik pilersitseqqittariaqarpugut, Ukraine pillugu isumaqatiginnginnerat aalajangiusimaatigalugu. Taakku marluk immikkoortinneqarsinnaanersut misilinneqartariaqarpoq.
Ruslandimut qaninnerusumik atassuteqarneq qaffasissumi aallartittariaqanngitsoq, Steen Kjærgaard oqarpoq.
Putinimmi Trumpillu inimi ataatsimoorlutik Issittoq pillugu oqaloqatigiinnissaat piumasarilersinnaanngilarput. Upperiatsajanerussaaq.
Siunnersuut ’issittumi NATO’-tut aallarniutaasutut Issittumiluunniit Siunnersuisooqatigiit assinganik pilersitsinertut paasineqassanngitsoq taassuma erseqqissaatigaa.
Naalagaaffeqatigiinnili nunat Ruslandimut mikisualukkaat pillugit qaninnerusumik suleqatiginnittariaqarput.
Matumani Issittumi Sakkutooqarfik russinik imaatigut annaassiniartarneq pillugut suleqateqarsinnaapput imaluunniit kulturikkut atassuteqarnermik russinik suleqateqartoqarssinnaavoq, naalakkersuinermik imaqarpallaanngitsumik.
- Uatsinnut naqqarpiaanit aallartinnissamut tunngavoq. Mikisualunnik suleqatigiinneq ineriartortinneqarsinnaavoq, Steen Kjærgaard oqarpoq.