Københavnimi ilinniartortavut immaqa kollegiassarsissunneqangajalertut
Danmarkimi illoqarfiit pingaarnersaanni, Københavnimi, ilinniartortavut 25-t 30-llu akornanni amerlatigisunik 2024-mi immaqa kollegiassarsissunneqarsinnaalissapput.
Siumut tusagassiuutinut taama nalunaarpoq.
Københavnimi ilinniartortatta kollegiassaaleqisarnertik sivitsortumik suaartaatigaat. Siumut danskit 2021-mi aningaasanut inatsisaannit Københavnimi ilinniartortatta qanoq kollegiassarsissunneqariaannaanissaannik misissuisitsinisssamut aningaasaliisoqarnissaanik qulakkeerisuuvoq.
Københavnimi ilinniartortavut kollegiassaannik pilersitsisoqarsinnaanersoq ilaatigut misissorneqartoq, Siumut tusagassiuutinut nalunaarummini allappoq.
1,5 millionit koruunit 2021-mi 2022-milu atugassatut aningaasaliissutigineqarput, taakkualu Kalaallit Københavnimi Illuutaata Københavnimi ilinniartortatsinnut amerlanerusunik qanoq kollegiassarsissusisoqarsinnaaneranik misissuineranut atorput.
Kalaallit Københavnimi Illuutaat tamatumunnga atatillugu nalunaarusiorpoq, Københavnimilu ilinniartortatsinnut kollegiassarsissussinissaq aallarniutigerusuppaa. Tassa taakkununnga 25-t 30-llu akornanni amerlatigisunik kollegiassarsissusiviusinnaasunik ujartuisoqassaaq.
2024-mi immaqa kollegiassarsissunneqassasut
Københavnimi ilinniartortatta kollegiassarsissunneqangajalernerat, Folketingimi ilaasortap Siumumeersup, Aki-Matilda Høegh-Damip nuannaarutigaa.
- ”Københavnimi ilinniagaqarlunga Avalammi ilaasortaavunga, tassanilu ilinniartut inissaqarniarnerat ajornartorsiutaasoq takuara. Tamanna saniatigut kalaaliulluni Danmarkimi ilinniagaqartuulluni kiserliornartuusoq aamma malugaara. Taamaattumik 2019-mi qineqqusaarama ilinniartut ineqarniarnerat aaqqiivigineqarnissaa ilaatigut qineqqusaarutigaara, Aki-Matilda Høegh-Dam tusagassiuutinut nalunaarummi oqarpoq nangillunilu:
- Ilinniakkamik aallartitsiniartut inissaqalernissaat piviusunngoriartornera nuannaarutigeqaara.
Kalaallit Københavnimi Illutaata pisortaata, Leise Johnsenip, tamanna nuannaarutigaa.
- Suliaq naammassiniarlugu Housing Foundation Copenhagen suleqatigaarput, taannalu 2024-mi ineeqqanik 25-t missaanniittunik pilersitsinissamik sulissuteqaleruttorpoq. Tamanna piviusunngussasoq neriuutigaarput, taanna oqarpoq.
Housing Foundation Copenhagen tassaavoq Københavnimi ilinniartunut inissarsissussiniarfik.