Naalakkersuisoqatigiit Kinami sinniisoqarfeqalerusupput

-  Uani kalaallit Asiami ersarinnerullutik inissisimanissaat pisariaqartinneqarluinnarpoq,

Ane Lone Bagger inatsisartuni pingasunngornermi  Nunanut allanut tunngasunut naalakkersuinikkut nassuiaatip saqqummiunneqarnerani taama oqarpoq.

Ane Lone Bagger Naalakkersuisoqatigiit Kinami sinniisoqarfimmik pilersitserusunnerat pillugu Inatsisartut oqaluttarfianniit taama oqarpoq.

KNR-imullu ima itisiliivoq:

 - Avammut niuernissamullu aamma soorunalimi Asiami nunat kangisissuani aningaasaqarnikkut suleqatigiinnissamik annertusaanissamut kissaat aamma amerlasuutigut tunngaveqarpoq.  

AAMMA ATUARUK Naalakkersuisoq vil sælge vand i Kina

Kisianni Kinami sinniisoqarfeqalernissamik kissaat akunnattuungassutigineqarpoq:

- Imaanngitsoq Kinami sinniisoqarfimmik pilersitsisoqarnissaa akerlerigatsigu. Kisiannili tunngavilersuutit, oqimaalutat, qanoq ittuunersut soorunalimi apeqqummi tassani pingaaruteqarmat, Inuit Ataqatigiit nunanut allanut tungasuni oqaaseqartartuat, Sofia Geisler, taama oqarpoq. 

Taassuma kangiani sinniisoqarfeqalissagutta, Kina piukkunnarnerpaanersoq qularutigaa:

- Kisiat aamma Kangiani assigiinngitsutigut ingerlanneqartut, Namminersorlutik Oqartussaninngaanniit suleqataaffigineqartut imaluunniit niuerfigineqartut Kangiani nunat allat aamma piummata, taakkunaniinnanni kisianni Kinami inissinneqassappat soorunalimi tunngavilersuutigisassaat takussavagut isummerfigalugillu. 

AAMMA ATUARUK Danmark nunarpullu Kinamut erseqqissunik tunaartarisassiortariaqarput

  Kinami sinniisoqarfimmik pilersitsisoqarnissaanik Naalakkersuisoqatigiit oqariartuuteqaraluartut sumi ammaasoqarnissaa Inatsisartut inaarutaasumik aalajangigassarissavaat.

 - Soorunalimi aalajangiinissaq Inatsisartut aalajangigassaraat akuersissanerlutik. Sinniisoqarfimmik ammaasoqassanersoq sumiinnissaalu, Nunanut allanut tunngasunut Naalakkersuisoq Ane Lone Bagger taama oqarpoq.

Nunarput Københavnimi, Bruxellesimi, Washington D.C.-imi aamma Reykjavikkimi ullumikkut sinniisoqarfeqarpoq

Qanoruumi ilanngutassiaq uani takuneqarsinnaavoq.