Nalunaarusiaq nutaaq: Danmark nunarpullu Kinamut erseqqissunik tunaartarisassiortariaqarput
oktoberip 26-ani nal. 11.45 naqqitaqarpugut
Kinap isertuussaminik nunatsinni soqutigisaqarnera oqaluuserineqartupilussuuvoq, DIIS-illi nalunaarusiaa nutaaq naapertorlugu Kinap isertuussaminik siunertaqarneragaanera tunngavissaqanngilaq.
- Naamerluinnaq. Kinap Issittumut soqutiginninnera isertuussanik siunertaqanngilaq, DIIS-imi siunnersortaaneq nalunaarusiamillu suliarinnittoq, Yang Jiang, taama allappoq.
AAMMA ATUARUK USA Danmarkilu Kina pillugu isumaqatigiinngissuteqarput
Kinamiummi naalakkersuisui januaarimi 2018-imi white paperimik taasamik saqqummiussaqarput, Kinallu Issittumi soqutigisai tassani erseqqissarneqarlutik. Kina ’naalagaaffittut issittumut qanittutut’ imminut taavoq, Kinallu umiarsuit aqqutissaannik nutaanik sullissiviusussamik Kalaallit Nunaanni pinngortitami pisuussutinik ineriartortitsinissamut ’issittumi siilikip aqqutaanik’ pilersitsinissamik anguniagaqarnera tassani atuarneqarsinnaavoq.
Suliniutit tallimat Kinamit peqataaffigineqartut:
- Citronen Fjord: China Nonferrous, Kinap naalagaaffianit pigineqartoq
Suliffeqarfik Metal Industry’s Foreign Engineering and Construction Citronen Fjordimi zinkimik piiavimmut aningaasaliivoq. Pingaarnertut aningaasaliisoq tassaavoq ingerlatseqatigiiffik Australiamiunit pigineqartoq Ironbark. - Wegenerip Qeqertaasaani kanngussamik piiaanissamik suliniut: Suliffeqarfik namminersortunit pigineqartoq, Jiangxi Zhongrun, Nordic Miningimut 2008-mi isumaqatigiissuteqarpoq Kinamiunilu siullersaalluni nunatsinni piianissamut akuersissummik 2009-mi tunineqarluni.
- Saviminissamik piiaavik: Suliffeqarfiup namminersortunit pigineqartup General Nicep Nuup avannaata kangiani kilometerinik 150-inik ungasitsigisumi piiaavimmik suliniummik nammineerluni ingerlatsisuuvoq. Suliffeqarfiup suliniummut pisinnaatitaaffiit London Miningimit 2015-imi tiguai.
- Kuannersuarni suliniut: Kinamiut ingerlatseqatigiiffiat Shenghe Kuannersuarni piiaaviliornissamik suliniummut aningaasaleeqataasuuvoq. Pingaarnertut aningaasaliisoq tassaavoq Greenland Minerals and Energy (GME).
- Mittarfiliortiternissamik suliniutit: Kinap naalagaaffiata ingerlatseqatigiiffiutaa CCCC Nuummi, Ilulissani Qaqortumilu mittarfiit tallilerneqarnissaannut neqerooqataasussatut 2018-imi marsip qaammataani toqqagaavoq. Danmarkilli mittarfiliortiternermut aningaasalersueqataanissaminik soqutiginnilernerata kingorna Kinamiut peqataatinneqarnissaat unitsikkallarneqarpoq.
Aalajangersimasunik malittarisassaqassaaq
Kinallu soqutigisai taama erseqqitsigitillugit Danmark nunarpullu sapinngisamik piaarnerpaamik Kinap suleqatigineqarneranut aalajangersimasunik tunaartarisassiortariaqartut, Yang Jiang isumaqarpoq. Pingasunillu kaammattuuteqarpoq:
- Danmark Kinamut isumaqatigiissusiussaaq, tassanilu nunatsinni periarfissat killersuutaasullu ersarissumik aalajangersarneqassapput
- Nunarput akuersissutinut, niuernikkut misissuinernut kiisalu piiaaveqarnikkut attaveqaateqarnikkullu nalorninaateqarsinnaasunik suliaqarnermut malitarisassanik aalajangersaassaaq
- Suliniutit sorliit illersornissamut sillimaniarnermullu politikkip ataaniinnersut Danmarkip nunattalu nassuiassavaat
- Mittarfiliortiternerit piffissami kingullermi oqallisaanerisa takutippaa nunat allat Kalaallit Nunaanni aningaasalersuisarnerinut erseqqissunik tunaartarisassaqartariaqartoq, Yang Jiang, DIIS-imi siunnersortaaneq nalunaarusiamillu suliarinnittuusoq oqarpoq.
Kinamiut ingerlatseqatigiiffiata mittarfiit nutaat sanaartornissaannut neqerooruteqarnissaminut piareersimasoq ukioq manna siusinnerusukkut saqqummiunneqarpoq. Danmarkilu mittarfiliortiternissamut aningaasalersueqataanissamik juunimi saqqummiussaqarpoq. Immaqa Kinamiut soqutigisallit ingalassimaniarnissaannik siunertaqartumik. Taamatullu pisoqarnera Naalakkersuisuni sakkortuumik assortuussutaalerpoq Partii Naleqqallu naalakkersuisooqatigiinnit tunuarneranik kinguneqarluni.
AAMMA ATUARUK Danskit aningaasaliissuteqarnerat Kinamut tunngassuteqarpoq
AAMMA ATUARUK Bent Måløvimiu sapaatit akunnerini pingasuni politikkikkut puullaaqititsisoq
- Erseqqissunik tunaartarisassiortoqarneratigut aningaalersugassanik suliniutit ataasiakkaarlugit oqallisigineqartariaqarunnaassapput, Yang Jiang oqarpoq.
