Ilisimasalik: Danskit aningaasaliissuteqarnerat Kinamut tunngassuteqarpoq
- Kinamiut nunamiilernissaat pinngitsoortinniarlugu taamaaliortoqarpoq. Danmarkimmi aningaasanik taama amerlatigisunik tunniussaqarnera allatut paasineqarsinnaava?, Illersornissaq pillugu ilisimatusarfimmi lektori Jon Rahbek-Clemmensen taama naliliivoq.
Danmarkillu Kalaallit Airportsimik piginneqataanissaanut piumasaqaatit suli isumaqatigiissutigineqarsimannginnerat immikkut maluginiarpaa:
- Apeqqutit qulaajarneqartussat ilagaat illuatungeriit itigartitsisinnaatitaanermut periarfissaat allanullu attuumassuteqarnerinut tunngasut, uangalu naliliinera naapertorlugu, taamatut isumaqatigiissusiortoqarnera Kinamiut suliffeqarfiutaata mittarfinnik sanaartornissaanut Danmarkip itigartitsisinnaaneranik periarfissaqartitsissaaq, Rahbek-Clemmensen taama oqarpoq.
Taanna nassuiaavoq Kinamiut nunatsinniinnerat ernumanartoqartillugu USA-mit erseqqissumik oqaatigineqarsimasoq:
- Taamaammat Kinamiut ingerlatseqatigiiffiata mittarfinnik sanaartornissaa arlaatigut pinngitsoortissallugu Danmarkip pisariaqartippaa.
Lars Løkke Rasmussen tusagassiortunik katersortitsinermi ataasinngormat ima oqarpoq:
- Kinamut tunngatillugu oqaatigiinnarsinnaavara Kinamiut akuutinneqarsinnaanerat ajoriffissaqartinngilluinnaratsigu.
Ministeriunerulli taamatut oqaaseqarnera pissusissamisoorluinnartuusoq, Jon Rahbek-Clemmensen isumaqarpoq:
- Lars Løkke Rasmussenimi Kinamiut ingalassimaniarnissaat pissutigalugu taamaaliortoqarneranik oqaraluarpat tamanna Danmarkip Kinamut atassuteqarneranut ajorluinnartuussaaq. Taamatut siunertaqarlutik nassuerutigisinnaanngilaa.
