USA Danmarkilu Kina pillugu isumaqatigiinngissuteqarput

Kinamiummi Nuummi Ilulissanilu mittarfiliortiternissanut soqutiginninnerujussuat, USA-p illersornissaqarfiata ernummatigigaa, USA-p illersornissamut ministeriata tullersortaasa ilaata Katie Wheelbargerip aviisimut oqaatigaa.

- Kinamiut aningaasaliinermikkut sakkutooqarnikkut annertusaaniarsinnaasarnerat eqqumaffigaarput. Ernumanarpoq, Wheelbarger Politikenimut oqarpoq.

- Niueqatigiinnermut aningaasarsiornermullu iliuuserisassatut pilersaarutaat, isumannaallisaanermut illersornissaqarnermullu iliuuserisassatut pilersaarutaannut attuumassuteqarluinnarput, oqarpoq.

Kinamiut tamanna pillugu nunatsinni mittarfiliortiterniarnernut akuutinneqannginnissaat USA-p Danmarkimut Nunatsinullu kaammattuutigineraa, Politikenip Wheelbargerimut apeqqutigaa:

- Aap, USA-p illersornissamut ministeriata tullersortaa naatsumi akivoq.

Danmarkip USA-llu ajornartorsiummut qisuariaataat assigiinngissuteqartut, Danmarkip illersornissamut ministeriata Claus Hjort Frederiksenip oqaatigaa:

- Tamanna pillugu isumarput oqimaaqatigiissagaavoq. Mittarfiliortiternissanut isumaqatigiissusiorfigineqarpata ajornartorsiutitut isiginngilarput, ingerlanneqarnissaalli allaavoq. Kalaallit Nunaataluunniit aningaasaliissutinut atatillugu isumaqatigiissutit eqquutsissinnaanngippagit, illersornissamut ministeri Politikenimut oqarpoq.