KNR-ip aningaasaateqarfittut allanngortinneqarnissaa innersuussutigineqarpoq

KNR-ip aningaasaateqarfinngortinniarneranut ilaatigut siunertaavoq akiitsut peerlugit aningaasaatitut nuunneqarnissaat, tamannalu tamanut iluaqusiissasoq, KNR-ip pisortaa, Lars Lennert Sandgreen, oqarpoq.

Aningaasaateqarfik Namminersornerullutik Oqartussanit pigineqartussaq arlaannut attuumassuteqassanersoq apeqqutigineqarmat,

Lars Lennert Sandgreen ima nassuiaateqarpoq:

- Una inuutissarsiutigalugu aningaasaateqarfiussaaq, tassa fondelioriaatsit assigiinngitsuugamik, assersuutigalugu suliffeqarfinni allani aamma taamatut aaqqissuussisoqartarpoq, aningaasaateqarfinngorlugit. Uani anguniarneqarpoq KNR-ip immikkuullarissuunerata erseqqissarnissaa, aamma taanna tamatsinnut iluaqutaassaaq, KNR-imut aamma politikerinut, erseqqissumik allaqqasoqarpat imaattumik; una KNR Fondiuvoq, toqqaannartumik naalakkersuisoqarfiup ataaniigani, soorlu allaffeqarfittut, taamatupajaaq.

>Tamanna qanoq nassataqassava?<

- Pinngitsoornani erseqqinnerusumik aningaasatigut nalunaarusiortarneq, aamma soorlu pigisat, atortut illuutillu nalilersorneqarneri erseqqinnerusumik takussutissaqalissapput. Aamma una akiitsoqarneq, aningaasaateqarfinngortinneqarnissaanut siunniunneqarami akiitsut peerlugit aningaasaatitut nuunneqarnissaat, Namminersornerullutik Oqartussat ataanni pigineqartussanngorlugu siunnersuutigineqarpoq.

>Tamanna KNR-ip atuisuinut qanoq sunniuteqassava?<

- Soorunami pitsanngorsaaniarneq erseqqinnerusumillu Public Servicep aqqani, imaluunniit kiffartuussinerup qaammarsaanerullu nukittorsarnissaanik taanna siunertaqarpoq. Taamatut erseqqissumik arlaannaanulluunniit attuumassuteqanngitsumik suliffeqarfeqaraanni, KNR-itut ittumik, taava apeqquserneqarsinnaanngitsumik taassuma tungaatigut assigiinngitsutigut iluaqutissaqartussaavoq. Una naalaartut pitsaanerusumik tusagaqarnerunissaat isiginnaagaqarnerunissaallu taanna aningaasanik amerlanerusunik tunuliaqutaqartariaqarpoq.