KNI-mi pisortaasimasoq ukiuni marlunni pineqaatissinneqarsimasunut inissiisarfimmiittussanngortinneqartoq
Nunatta Eqqartuussisuuneqarfiata KNI A/S-imi naatsorsuuserinermut pisortaasimasup 3,2 millionit koruunit missaasa nalinganut peqquserluuteqarsimasutut peqquserlullunilu allagaasiorsimasutut eqqartuunneqarnerata suliareqqitassanngortinneqarnera ulluni kingullerni suliaraa.
Tamannalu ukiuni marlunni pineqaatissinneqarsimasunut inissiisarfimmiittussanngortinneqarneranik inerneqarpoq.
Kalaallit Nunaanni Politiit tusagassiuutinut nalunaarummi allapput.
KNI-mi pisortaasimasoq Eqqartuussiveqarfik Qeqqami eqqartuussinermi ukiuni pingasuni pineqaatissinneqarsimasunut inissiisarfimmiittussanngortinneqarnikuuvoq. Suliarli suliareqqitassanngortinneqarpoq, taannalu Nunatta Eqqartuussisuuneqarfiata sapaatip akunnerani matumani suliaraa.
Tamannalu pineqaatissiissutip ukiunit pingasunit marlunnut sivikillineqarneranik inerneqarpoq, Nunatta Eqqartuussisuuneqarfiatami KNI-mi pisortaasimasup unnerluussisummi allassimasutulli taama amerlatigisunik aningaasannassimanissaanut uppernarsaatissaqartinngilaa.
KNI-mi pisortaasimasoq 2014-imit 2021-mut peqquserluuteqarsimallunilu peqquserlulluni allagaasiortarsimavoq. Naatsorsuuserinermut pisortaq atsiornernik peqquserlulluni issuaasarsimasutut, akiligassat allagartaannik akuerineqareersunik kisitsitaannik allanngortitsisarsimasutut mailinillu eqqunngitsunik ingerlatitseqqiisarsimasutut taamaalillunilu 2,1 millionit koruuninit ikinnerunngitsunik nammineq pissarsisimasutut unnerluutigineqarpoq.
3 millionit 1 millioninngortut
Aammattaaq 2017-imit 2019-imut naatsorsuuserinermut pisortatut atorfimminit atornerluilluni KNI-p KNI-p akissaatinik aaqqissuussineranut tunngavissaqanngitsumik pilersitsisimavoq, taamaalilluni piffissaq taanna tamaat akileraarusiinnginnermi nammineq 3 millionit missaannik aningaasatigut iluanaaruteqarluni.
Nunatta Eqqartuussisuuneqarfiatali aningaasat 3 millioniunatik 1,1 millionit koruuniutippai.
- Suliaq una maanna naammassivoq, Nunatta Eqqartuussisuuneqarfiata peqquserluuteqartutut allagaatinillu peqquserluuteqartutut eqqartuussuteqarnera naammagisimaarpara, Kalaallit nunaanni Politiini unnerluussisussaatitaasoq, Morten Gimm Hvergel tusagassiuutinut nalunaarummi oqarpoq.
Nunatta Eqqartuussisuuneqarfiata KNI A/S-imi naatsorsuuserinermut pisortaasimasoq unnerluutigineqartut naapertorlugit eqqartuussinnginnera unnerluussisussaatitaasut soorunami tusaatissatut tiguaat.
- Nunatta Eqqartuussisuuneqarfiata peqquserluuteqarnermut tunngatillugu 3 millioninit 1 millionit koruuninut appaanera unnerluussisussaatitaasut tusaatissatut soorunami tiguaat, Nunatta Eqqartuussisuuneqarfiatali peqquserluuteqartoqarlunilu allagaatinik peqquserluuteqartoqarsimaneranut isumaqataanera maluginiarpara.
- Nunatta Eqqartuussisuuneqarfiata aalajangernerata annertuumik aaqqissuussaasumillu aningaasatigut pinerluuteqartoqarsimanera allanngortinngilaa, Morten Gimm Hvergel oqarpoq.
