Nunatsinni tamarmi kommunimut qinersinermi kisitsisit kisinneqaleruttorput. Kisitsisit kisinneqarneranni uani malinnaasinnaavutit.

Ittoqqortoormiinit kisitsisit nalunaaqutaq 21 kisinneqareerput - Inuit Ataqatigiillu tassani taaguunneqarnerpaavoq. IA siariarpoq, qinersisullu 56,4 procentiinit taaguunneqarluni. Mette P. Barselajsen qinigaanerpaavoq.

Qeqertarsuarmi Simigaq Heilmann (Demokraatit) 140-nit taaguunneqarluni qinigaanerpaavoq.

Siumut Tasiilami siuariangaatsiarpoq, kingullermillu qinersinermit 30 procentimik qinerneqarnerulluni. Siumut Nanortalimmi aamma qinigaalluarpoq, Anders Olsenilu  Nanortalimmi qinigaanerpaalluni.

Naleraq Maniitsumi siuariartoq

Naleraq maniitsumi siuariarpoq, partiimiillu Nathan Møller 285-init taaguunneqarluni taaguunneqarnerpaavoq. Naleraq qinersisut 41,3 procentiinit taaguunneqarpoq, Malik Berthelsenilu Maniitsumi taaguunneqarnerpaani qulini ilaanani.

Nuummit kisitsisit kisinneqartut

IA illoqarfiit pingaarnersaanni naak kinguariaateqaraluarluni suli annerpaavoq. IA 11 procentpointinik kinguariaarteqarpoq, taamaakkaluartorli illoqarfiit pingaarnersaanni qinersisut 40,6 procentiinit taaguunneqarsimalluni. Siumut aamma kinguariaateqarpoq, Demokraatillu siuariaateqarlutik.

Siumut 1,2 procentpointinik kinguariaateqarpoq, Demokraatillu 14 procentpointinik siuariaateqarlutik.

Illoqarfiit pingaarnersaanni qineqqusaartunik taaguussinerit imminnut qanittunnguupput. Martha Abelsen Siumumeersoq 688-init taaguunneqarpoq, maannakkullu borgmesteriusoq  Avaaraq Olsen qulinik ikinnerusunik tassa 678-init taaguunneqarluni.

Illoqarfiit pingaarnersaanni qinikkat ima agguataarneqarput: Siumut arfineq-marlunnik, IA arfineq-marlunnik Demokraatit sisamanik Nalerarlu ataatsimik qinigaatitaqarput.

Taamaammat Siumut IA-lu kommunalbestyrelsimi siuttuunissaminnut immikkut isumaqatigiinniarnermik aallartitsisinnaapput. Siumup IA-llu illoqarfiit pingaarnersaanni naligiinnerat qaqutigoortuuvoq.

Kommune Kujallermi inatsisartunut ilaasortaasimasoq ajugaasoq

Malene Vahl Rasmussen Demokraatineersoq Kommune Kujallermi ajugaavoq.

Taanna Inatsisartunut ilaasortaanikuuvoq, borgmesterinngornissamullu apeqqummut ima oqarpoq:

- Akisussaaffimmik tigusissaagut.

Taassuma kommunip aningaasaqarnerliornera kommunalbestyrelsip siullertut sulissutigissagaa innersuussutigalugu.

Borgmesterinngorniuuttut

Ilulissanit kisitsisit kisinneqareerput, Demokraatiniillu Heidi Møller taaguunneqarnerpaajuvoq, taassumalu parteeqataa Palle Jeremiassen maanna borgmesteriusoq 97-iinnarnit Ilulissani taaguunneqarluni.

Heidi Møllerip Palle Jeremiassen borgmesteritut atuuffimmut unammillerlugu KNR-imut siusinnerusukkut uppernarsarnikuuaa.

Sisimiunit kisitsisit piareertut

Illoqarfiit annersaata tulliani Sisimiuni Siumut partiini taaguunneqarpaavoq. Siumut qinersisut 41,2 procentiinit taaguunneqarpoq, Demokraatillu taaguunneqarnerpaat tulliullutik. Demokraatit kingullermik qinersisoqarneranut sanilliullugit 21,5 procentpointimik siariarput.

Demokraatit qinigassanngortittunit taaguunneqarpaartaqarput. Rachel Ingemannimi Demokraatineersoq 657-init taaguunneqarpoq, maannalu borgmesteriusoq Malik Berthelsen taaguunneqarpaat tulliulluni 477-init taaguunneqarpoq.

IA kinguariangaatsiartoq

Ane Hansen (IA) Kommune Qeqertalimmi borgmesteritut tunuarniarluni oqarnikuuvoq, taassumalu partiia kinguariangaatsiarpoq: IA nalinginnaasumik kommunimi IA-qarfiulluaraluartumi 35 procentpointinik kinguariarpoq.

Siumut Kommune Qeqertalimmi qinersisut 39 procentiinit taaguunneqarlunilu siuariarpoq. Demokraatit aamma siuariarput – taakku 18 procentpointinik siariarput – kommunimilu partiit annerpaat aappaatut inissilluni.

Kujataani Demokraatit siuariarujussuartut – IA kinguariarujussuartoq

Demokraatit Qaqortumi siuariarujussuartut Siumut IA-lu kinguariartut.

Demokraatit illoqarfimmi taasinerni 53 procentiinik taakkulu amerlaqataanik procentpointinik taaguunneqarpoq, IA-li 29 procentpointingajannik aamma Siumut 24,4 procentpointinik kinguariartoq.

Taamaalilluni Kommuni Kujallermi Demokraatit partiini siuttunngorput.

Demokraatinit Malene Vahl Kommune Kujallermi tamarmi taaguunneqarnerpaalluni 361-init taaguunneqarpoq.

Borgmesteri Stine Egede 80-init taaguunneqarpoq.

Siumut avannaani taaguunneqarnerpaavoq

Siumut Avannaata Kommuniani 35,4 procentinit taagunneqarpoq. Taamaakkaluartorli 10 procentpointinik kinguariarpoq.

Demokraatit partiit anginerpaat pingajuattut inissippoq, 16,1 procentpointinillu siuariarluni.

Naleraq partiit annerit pingajuattut inissippoq.

Siumut arfineq-marlunnik qinigaatitaqarpoq, Demokraatit sisamat, Naleraq pingasut Atassut marluk IA-lu ataatseq.