KNI-p pisortaa pisortaasimasup eqqartuussaanerata kingorna: Tusaamaneqarnerput innarlerpaa
KNI-mi naatsorsuuserinermut pisortaasimasoq iliuuseqarnermini KNI-mut sulisuinullu pasinarsaasimavoq.
KNI-p pisortaanera, Jeppe Jensen naatsorsuuserinermut pisortaasimasup peqquserluttutut peqquserlullunilu allagaasiorsimasutut eqqartuunneqarnerata kingorna KNR-imut oqarpoq.
Taamaalioreernikuusimasoq
Naatsorsuuserinermut pisortap 6,1 millioninik peqquserlussimanera peqquserluuteqarlunilu allagaasiorsimanera paasineqarmat KNI-mit politiinut 2021-mi unnerluutigineqarpoq.
- Aningaasatigut annaasaqarnerup saniatigut KNI aammali KNI-mi sulisut iliuuseqarnermigut pasinarsarnikuuai, taamatullu piffissami sivisuumi suliffeqarfik isiginerlunneqalersillugu.
- Eqqartuussiviullu pineqaatissiinnera ingerlariaqqinnissatsinnut alloriarteqqissavaatigut, pisortaaneq, Jeppe Jensen oqarpoq.
Sisimiuni eqqartuussinerup ingerlanerani naatsorsuuserinermut pisortaasimasoq maanna eqqartuunneqarsimasoq danskit suliffeqarfianni millionilinnik koruuninik peqquserluuteqarsimasutut aamma eqqartuunneqarnikuusimasoq saqqummiunneqarpoq.
Taamaammat KNI-p aningaasaqarnerminut atatillugu pissutsit sukannernerusumik nakkutigilerpai, tatigisaminnillu suleqatitaassagaangamik taakku pinerlussimannginnermut uppernaateqartartussanngortut, pisortaq oqarpoq.
