KNI-mi aningaasaqarnermut pisortaasimasoq ukiuni pingasuni pineqaatissinneqarsimasunut inissiivimmiittussanngortinneqartoq

KNI-mi aningaasaqarnermut pisortaasimasumut aningaasanik tillissimanermik unnerluussut Eqqartuussiveqarfik Qeqqani Sisiumiuni sapaatip akunnerani uani suliarineqarpoq.

Taannalu maanna eqqartuunneqarsimalerpoq. Aningaasaqarnermut pisortaasimasoq ukiuni arlalinni peqquserluttarsimasutut uppernarsaatinillu atornerluisarsimasutut ukiuni pingasuni pineqaatisinneqarsimasunut inissiisarfimmiittussanngortinneqarpoq.  

Kalaallit Nunaanni Politiit tusagassiutinut nalunaarummi taama allapput. 

Atsiornernik salloqittaasiorsimasutut, akiligassanik akuereriikkanik allannguisimasutut, mailinillu ilumuunngitsunik allassimasutut pisuutinneqarluni minnerpaamik 2.100.000 koruuninik 2014-ip 2021-llu akornanni imminut iluaqusersorsimasutut eqqartuuneqarpoq. 

2017-ip 2019-illu akornanni aningaasaqarnermut pisortatut atorfeqarnini atornerlullugu pisinnaatitaaffeqarani KNI-ip akissarsialerissutaani atuisinnaalernermigut 3 millionit koruuninit ikinnerunngitsunik aningaasanik imminut iluaqusersorsimasutut pisuutinneqarpoq. 

- Suliaq una misissugassarujussuusimavoq, taamaammat unnerluussisussaatitaasut piumasai naapertorlugit Eqqartuussiveqarfik Qeqqata Sisimiuniittup unnerluunneqartumik pisuusutut eqqartuussinera iluarisimaarpara, Politiini unnerluussisussaatitaasoq Morten Gimm Hvergel tusagassiutinut nalunaarummi issuarneqarpoq. 

Aningaasaqarnermut pisortaasimasoq pillugu nalunaarut politiinut 2021-mi tunniunneqarpoq, taakkulu 2023-p tungaanut suliamik misissuipput. Maannalu suliami eqqartuussisoqarpoq, suliarli taamatut naammassinngilaq. 

- Unnerluunneqartup pinngitsuutinneqarnissani imaluunniit annikinnerusumik pineqaatissinneqarnissani anguniarlugu suliaq ingerlateqqippaa. Unnerluussisussaatitaasullu suliami sakkortunerusumik pineqaatissiisoqarnissaa anguniarlugu ingerlatitseqqiipput. Suliallu Nunatta Eqqartuussiveqarfiani suliarineqarnissaa utaqqisaalerpoq, Morten Gimm Hvergel oqarpoq.

Suliap Nunatta eqqartuussiveqafiani qaqugu suliarineqarnissaa ilisimaneqanngikkallarpoq.