Aarhusimi siunnersuut nutaaq nunatsinnut Savalimmiunullu ataqatigiinnerulersitsissasoq
Aarhusip Kommunia naalagaaffeqatigiinnermik ukkatarinninnerusariaqarpoq. Aarhusip kommuniani ingerlatsiviit ilaannut politikikkut akisussaasoq Jesper Kjeldsen Socialdemokratietiminngaanneersoq kommunalbestyrelsimilu ilaasortaq Jakob Søgaard Clausen Danmarksdemokraterninngaanneersoq tusagassiuutinut nalunaarummi siunnersuutiminnik arlalinnik saqqummiussisut isumaqarput.
Politikerit taakku marluk kommunip innuttaasut nunatsinneersut Savalimmiuneersullu pitsaanerusumik atugassaqartinnissaannut akisussaaffeqarnerunissaa kissaatigaat – pingaartumik naalagaaffeqatigiinneq aatsaat taama pingaaruteqartigitillugu.
- Naalagaaffeqatigiinneq ataatsimut oqaluttuarisaanitsinni pingaarutillit ilagaat ataatsimulli siunissaqarnitsinnut suli pingaaruteqarneruvoq. Kalaallit Savalimmiormiullu Aarhusimi najugallit amerlasuut pissusissamisoortumik ersarissumillu illoqarfimmi ataatsimooqataanissaat akisussaaffigaarput, Jesper Kjeldsen nammineq aamma nunatsinni najugaqarlunilu sulisimasoq taama oqarpoq.
- Taamaattumik Aarhusip, Kalaallit Nunaata Savalimmiullu akornanni ataqatigiilluarnerup ingerlalluarnissaa ersarinnerulernissaalu anguniarlugu ataavartumik ataatsimullu isiginnittumik suliniuteqarusuppugut, taanna nangippoq.
Kommunimi naleqartinneqarneq
Siunnersuummi Jesper Kjeldsen Jakob Søgaard Clausenilu kalaallit Savalimmiormiullu Aarhusimi najugallit iliuuseqarfigineqarnerunissaannut suliniutinik assigiinngitsunik saqqummiussipput.
Kommunip nunatsinni Savalimmiunilu inuiattut ullorsiornerni erfalasulertarnissaa naalagaaffeqatigiinnermilu nunat pingasut ataqatigiinnerinut ilisarnaataasumik Aarhusimi tamanut ammasumik eqqumiitsuliortoqarnissaa ilaatigut siunnersuutigaat.
Kommunip immikkoortortaqarfii assigiinngitsut namminneq akisussaaffeqarfimminni Aarhusip Kommuniata naalagaaffeqatigiinnermut qanorililluni pitsaanerusumik attaveqarsinnaaneranut tunngatillugu siunnersuuteqartarnissaat ilanngullugu siunnersuutigaat.
Jakob Søgaard Clausenip Danmarksdemokraterninngaanneersup oqarnera naapertorlugu nunarput, Savalimmiut Danmarkilu Naalagaaffimmi ataqatigiipput, tamannalu Aarhusimi malugineqassaaq.
- Taamaattumik neriuppunga kommunalbestyrelsimi ilaasortat tamarmik kalaallit Savalimmiormiullu kommunitsinniit pingaartinneqarneri ataatsimoorlutik oqaatigisinnaassagaat Aarhusimilu atugarissaarnissaat angerlarsimasutullu misiginissaat anguniarlugu immikkut suliniuteqarnerusariaqartugut, tusagassiuutinut nalunaarummi taama oqarpoq.
Politikerit taakku marluk oqaaseqarnerat naapertorlugu naalagaaffeqatigiinneq pillugu politikkeqalernissaq Aarhusillu Kommuniani piorsarsimassutsikkut ataatsimoornissaq siunertaavoq.
