Amerikamiut præsidentiat Donald Trump pisuulluni nunarput sammineqaqqilerpoq. 

Natop Ankarami Tyrkiap illoqarfiisa pingaarnersaanni ataatsimeersuarnerani taamaaliorpoq, illersoqatigiinnermullu Natomut tunngatillugu naammaginninnginnini ilanngullugu eqqaavaa.

Tyrkiap præsidentiata Recep Tayyip Erdoganip ataatsimeeqatiginerani Trumpip nunarput Danmarkimit aqunneqarnani USA-milli aqunneqartariaqarnera erseqqissaassutigaa. 

- Taassuma Natomut attaveqarnera ajortippaa. Kalaallit Nunaata Danmark ikiunngilaa. Danmarki Kalaallit Nunaannik ikiuiniarluni aningaasanik atuinngilaq tamannali (Kalaallit Nunaat aaqq.) USA-mut pingaaruteqartunut ilaavoq, Donald Trump  Ritzauip nutaarsiassiinera naapertorlugu marlunngornermi oqarpoq. 

Tamanna pillugu Natop qullersaa Mark Rutte peqatigalugu ataatsimut tusagassiortunik pingasunngornermi katersortitsinermi kingorna  oqaaseqartoqaqqippoq.

- Kalaallit Nunaat uagutsinnut ajornartorsiuterujussuuvoq. Ajornartorsiutillu aappaa tassaavoq taakkua (Natomi nunat, aaqq.) suleqataaqqullugit qinnuigigatsigit (Iranimut sorsunnermi, aaqq.)  tapersersuisimannginnerat, Donald Trump DR-ip nutaarsiassiinera naapertorlugu taama oqarpoq. 

Jeppe Strandsbjerg Nasiffimmi – nunanut allanut sillimaniarnermullu Ilisimatusarfimmi – Illersornissamilu Ilisimatusarfimmi lektori aperissagaanni Trumpip nunatsinnik tiguaanissaminut suli kissaateqarneranut uppernarsaataavoq.

- Trumpip ilumooruppaa aamma qaammatialunni eqqartorneqanngikkaluartoq allamilluunniit ukkatarinnimmat isumaqartoqassanngilaq politikkikkut maluginiarneqarunnaassasoq. Tamanna tunngaviusumik kissaataavoq, Jeppe Strandsbjerg taama oqarpoq. 

Jeppe Strandsbjerg Ilisimatusarfimmi lektoriuvoq. Assi © : KNR/Carsten Faurschou

Nunatta ajornartorsiornera Trumpip USA-p Europamut attaveqarneranut tunngatillugu apeqqusersuineranut aamma atorneqarpoq.  

- (Trumpip, aaqq.) Iranimut sorsunnerup allallu tapersersorneqannginnerat aamma isornartorsiorpaa. Taava isumaqatiginngisaqaraangami piumasamisulluunniit pisoqanngikkaangat Europamut oqartarpoq: ”taava nammineerniaritsi”, Jeppe Strandsbjerg nangippoq. 

Trumpimut ersersitsiniaaneq

Kalaallit Nunaat, Danmark USA-llu suleqatigiissitaat qaffasissumik inissisimaffillit, akerleriinnermut aaqqiissutissarsiorlutik maannakkut isumaqatigiinniarput. Suleqatigiissitaq ministerit Washingtonimi januaarimi ataatsimeereersullu pilersinneqarpoq.

Danskit nunanut allanut ministeriata Lars Løkke Rasmussenip suleqatigiissitat USA-p isumannaallisaanikkut soqutigisaanut aaqqiissutissanik nassaarnissaa "suli upperilluinnarlugu", Natop ataatsimeersuarnerani oqaatigaa.

Jeppe Strandsbjergip oqarnera naapertorlugu, oqallinnerup nutaarsiassani qulequtarineqannginnissaa soqutigineqarpoq.

- Taamaattumik amerlanertigut suleqatigiissitanut innersuussisoqartarpoq aaqqiissutissanillu nassaartoqarsinnaanissaa neriuutigineqarluni, taanna oqarpoq.

- Tamatuma saniatigut aamma allamik pisoqarpoq, Jeppe Strandsbjerg nangilluni oqarpoq, tassa Kalaallit Nunaata Danmarkillu Europami Natomullu atatillugu tapersersorneqarnissartik qulakkeermassuk.

- Kalaallit Nunaannut Danmarkimullu nunanit tamalaanit tapersersortissaqarumalluni. Aammali Trumpimut taassumalu ilagisaanut, nammineerluni iliuuseqarneq kinguneqarumaarneranik ersersitsiniaaneruvoq, taamaaliornerullu kinguneri sapinngisamik annertuujutinniarneqassasut. Taamaaliuinnartoqarnissaalu ilimanarpoq.

Siunissarput uatsinnit nunatsinni aalajangerneqassaaq

Nunanut allanut tunngasunut naalakkersuisoq Múte B. Egede (IA), Trumpip oqaasii pillugit allaaserisaqarpoq.

Oqaaseqarnerani aammaarluni erserpoq nunatta aqunneqarnissaanik suli kissaateqartoq, naalakkersuisoq inoqatinut attaveqaatini taama allappoq. 

- Nunatsinni ataatsimoortariaqarpugut, iligut suleqatigullu aamma qanimut suleqatigalugit, Múte B. Egede allappoq nangillunilu: 

- Siunissarput uatsinnit nunatsinni aalajangerneqassaaq. Taamaattuarsimavoq. Taamaattuassaarlu. 

Danskit ministeriunerata Mette Frederiksenip, Trumpip Natop ataatsimeersuarnerani oqaasii aamma qisuariarfigai. 

- Danskit kalaallillu aalajangiusimasarput allanngortinnavianngilarput. Kalaallit USA-mut ilanngukkusunnginnertik erseqqissumik oqaatigereerpaat, Mette Frederiksen oqarpoq.