Tusagassiuutit: KNI-mi pisortaasimasoq peqquserluttuliorsimasutut allagaatinillu eqqunngitsuliortutut unnerluutigineqartoq
Politiit KNI-mi naatsorsuuserinermut pisortaasimasoq, 2021-mi suliffeqarfimmit peqquserluttuliorneq allagaatinillu peqquserluuteqarneq pissutigalugu soraarsinneqartoq maanna unnerluutigaat.
Sermitsiaq.AG unnerluussissut tunngavigalugu taama allaaserisaqarpoq.
Pisortaasimasoq 2014-ip 2021-milu upernaap tungaanut pillarneqaataasinnaasunik pinerluuteqartarsimasoq unnerluussisussaatitaasoq isumaqarpoq.
Suliaq unnerluutigineqartup 3,3 milliuunit koruuninit ikinnerunngitsunik pisassarinngisaminik imminut akissarsitittarsimaneranut, atsiornernillu peqquserlulluni issuaasarsimasutut, akiligassanillu akuerineqareersunik kisitsitaannik allanngortitsisarsimaneranut, mailinillu eqqunngitsunik ingerlatitseqqiisarsimaneranut tunngavoq.
Naatsorsuuserinermut pisortaasimasoq taassuma saniatigut eqqunngitsunik allagaasiortarsimavoq, aningaasanillu 2,1 millionit koruuninit ikinnerunngitsunik nammineq kontominut nuussisarsimalluni, Sermitsiaq.AG taama allaaserisaqarpoq.
Eqqartuussivimmi suliaq KNI-mi pisortaasimasumut tunngasoq Sisimiuni eqqartuussivimmi ukioq manna maajip qulingani aamma 13-ianit 16-ianut suliarineqassaaq.
Naatsorsuuserinermut pisortaasimasoq Danmarkimi Østre Landsretimik aamma eqqartuunneqareerpoq. Taanna karsimit tigusisimasutut 5,4 millionit koruuninik akiligassinneqarpoq.
Aningaasat eqqunngitsuliornermigut piaaralunilu namminermut atugassanngorlugit tigooqqartarsimasaanut naatsorsorneqarsimasut, KNI januaarip aallartinnerani eqqartuussisoqarnerata kingorna paasissutissiivoq.
