KNAPK-p umiatsianut nakkutiginninneq sukateqqugaa
Inuit immakkut angalatillutik tammaaneqarlutik nanineqanngitsoortut siorna 14-iusut KNR-ip saqqummiummagu, KNAPK sukaterinissamik ujartuilerpoq.
- Nakkutigineqanngillat umiatsiaaqqat normoqanngillat. Normoqartuuppata atortorissaarutit pigineraat iluamik allattungaatigineqalissagaluarput, Aalisartut Piniartullu Kattuffiani siunnersorti Niels Boassen oqarpoq.
Maqaasineqartut ajunaartullu 18-it akornanni 17-it imaatigut angallannikkut ajunaartuusut, taakkunannga 14-it nanineqaratik, nalunaarsorneqarsimasut Kalaallit Nunaanni imaatigut timmisartunillu annaassiniarneq pillugu ukiumoortumik nalunaarusiaanni atuarneqarsinnaavoq.
AAMMA ATUARUK Inuit katillugit 18-it imaatigut angallannermi nunamiluunniit ajunaartut
Nalunaarsuineq pitsaanerusoq
Imaatigut angallannermi sillimaniarnikkut atortunik, soorlu raatiuaqqanik, sumiissusersiutinik, puttaqutinik assigisaanilluunniit peqarnissamik piumasaqaateqarneq nakkutigineqartarnersoq KNAPK-p apeqquserpaa.
- Ilumut taakku inatsisit atuuttut nakkutigineqarpat? Imaluunniit nakkutigineqanngillat? Aatsaat ajutoortoqaraangat eqeertoqassava? Pinaveersaartitsinerup aqqani nakkutigineqartuarnissaat sukkut kikkullu isumagissavaat.
Nakkutiginninnerunissamilli noqqaassuteqaraluarlutik, immamik inuussutissarsiortut isumannaatsuunissartik namminneq akisussaaffigigaat, Inuussutissarsiortut kattuffiata naqissuserpaa.
- Tassa kinaluunniit inuussutissarsiornermut allagartaqalersimagaangat taava sillimaniarnermut atortutigut malitassat pinngitsoorani aamma malinneqartariaqarput, KNAPK-mi siunnersorti Niels Boassen oqarpoq.
