KNAPK akerliussutsimik takutitsinissamut piareersarpoq
Aalisartut Piniartullu Kattuffiata KNAPK-p sinerissamut qanittumi aalisartut atugaat piffissami sivitsulersumi naammagittaalliuutigisarpai, tassami isumaqaramik taakku atugaat ukiuni kingullerni ajorsiartuinnavissimasut. KNAPK-p immikkoortortaqarfiisa arlallit kajumissaarinerisigut, kattuffik nuna tamakkerlugu akerliussutsimik takutitsinissamut maanna aggersaavoq, atukkatik inuiaqatigiinnut ersarissarneqarniassammata.
Allattoq Elisa Isaksen
Qaleralinniarnermi saarullinniarnermilu atugassarititaasut naammagineqanngillat, aamma aalisarnermi aningaasartuutit qaffakkaluttuinnarnerat tunisinermilu akit appasippallaarnerat naammagittaalliuutigineqarput.
Sinerissami akerliussutsimik takutitsinerit marlunngornermi oktobarip aqqarnanni pissapput, aqaguanilu pingasunngornermi oktobarip aqqaneq-aappaani Nuummi aalisartut akerliussutsiminnik takutitsissallutik. Tamanna ulloqeqqata missaani KNAPK-p allaffeqarfianit Inatsisartut ataatsimiittarfiannut ingerlaaqatigiinnikkut pissaaq.