Kineserit suleqatigalugit nuannaraat
Royal Greenlandip Maniitsumi suliffissuani kinamiunik sulisoqareerpoq. Taakkulu suleqatiminnit nuannarineqartut, Royal Greenlandip Maniitsumi suliffissuani suleqataasut marluk oqarput.
- Ajunngeqaaq. Aamma ilikkariartornerini suleqatigalugit nuannersorujussuupput, iluaqutaaqalutillu, Pernille Jessen oqarpoq.
AAMMA ATUARUK Royal Greenland nunatsinneersunik sulilersitsisariaqarpoq
Aamma suliffissuarmi suleqataasup allap Jens Karl Kleistip kinamiunik suleqateqarnini nuannaraa.
Kinamiulli sulilinnginneranni pissangasimalluni oqaatigaa.
- Kinamiut qanoq suleriaaseqarnersut ilisimanngilluinnarakku. Nalorsassasoralugit, Jens Karl Kleist oqarpoq, nangillunilu oqarluni, kinamiut suliakkiissutigineqartartut sungiutiaaraat.
- Ilitsersuussutiginiakkagut assiliinnangajallugit tigoreertarsimavaat.
Tamannalu suliffissuup ingerlalluarnissaanut iluaqutaasoq, Pernille Jessenip isumaqarpoq.
AAMMA ATUARUK Politikerit suliartortitsisarneq ajornannginnerulersittariaqarpaat
- Suligaangamik uummaarissorujussuarmik pissuseqartarput. Ingerlalluaraangattalu assut iluaqutaaginnaavittarput.
Tunisassiassammi naammakkaangata Maniitsumi suliffissuaq ullukkut unnukkullu sulisartoqarpoq. Sulisulli aatsaat naammakkaangata taamaattoqarsinnaasarpoq.
- Inuit 20-t angullugit amigartaratta, ajoraluartumik, taama pisoqartussaanngikkaluartoq. Taakku kinamiut tikissimanngitsuuppata tassa immaqa holdi ataasiinnarluunniit ingerlasalersinnaagaluarpoq, Royal Greenlandip Maniitsumi suliffissuani sulisoq Jens Karl Kleist oqarpoq.
AAMMA ATUARUK Allamiunik sulisussarsinissamut malittarisassat sukateriffigineqartut
Sulisussanik 22-t tungaannut amerlatigisunik feriaqarnersiutinnattoqartillugu amigaateqalersinnaallutik, suliffissuarmi pisortaq, Susanne Marie Knudsen, KNR-imut allappoq.
Asiamiunik sulilersitsiniarneq SIK-mit isornartorsiorneqarpoq. Royal Greenlandip suliffissuarmini sulinissaq kajuminnarnerutilerlugu nunatsinneersunik sulisoqarnissani ilungersuutiginerusariaqaraa kattuffik isumaqarpoq.
AAMMA ATUARUK Asiameersut 27-t sulilersinneqartut