Allamiunik sulisussarsinissamut malittarisassat sukateriffigineqartut
Kalaallit Nunaannut suliffissarsiortut killilersimaarnissaat pillugu inatsisip allanngortinneqarnissaanik siunnersuut Inatsisartuni ippassaq pingajussaaneerneqarpoq, akueralugu taasisut 19-iupput itigartitsisullu pingasuullutik.
Malitarisassat nutaat naapertorlugit kommunit sapinngisamik ullut 14-it qaangiutsinnagit aalajangeereertussaapput, nutaartaali tassaavoq kommunit piffissaliussamik eqquutsitsinngippata nunatsinni suliffeqarfiit nunanit allanit sulisussarsinissamut akuersissummik piinnartarnerisa atorunnaarnissaa.
Aamma kommunit aalajangiinissaminnut paasissutissanik amerlanerusunik takussutissanilluunniit pisariaqartitsissagunik piffissaliussamik sivitsuinissaminnut periarfissaqalissapput.
AAMMA ATUARUK Malittarisassat sukannersut ajornakusoortitsipput
Taamatullu allannguuteqartitsisoqarneratigut suliffiit amerlanerusut nunaqavissunik inuttalerneqartalernissaat Naalakkersuisut neriuutigaat, Sulisitsisulli peqatigiiffiata GE-p malittarisassat allanngortinneqarnerat nuannarivallaanngilaa.
Sulisitsisummi peqatigiiffiata oktobarimi erseqqissaatigaa nunatsinni suliffeqarfiit nunanit allanit sulisussanik atorfinitsitsisariaqartarnerat nunatsinni sulisussanik pisariaqartinneqartunik pissarsiassaqannginneranik pissuteqartoq.