SIK Royal Greenland nunatsinneersunik sulilersitsisariaqarpoq
- Suliffissuaq manna akilersinnaasumik, taavalu oqartussat maleruaqqusaat malillugit ingerlassagutta, tunisassiornermilu maleruaqqusat atorlugit ingerlassagutta, sulisut naammattut atussallugit pisariaqarpoq, suliffissuarmi pisortaq, Susanne Marie Knudsen KNR-ip tv-kkut aallakaatitassiaanit, Sinerissatsinniit apersorneqarluni oqarpoq.
AAMMA ATUARUK Asiameersut 27-t sulilersinneqartut
Nunatsinneersunik sulilersitsisinnaanngitsut
Nunaqavissut suliffissuarmi sulilersinneqarusunnerugaluartut Knudsen oqarpoq.
- Kisianni pisinnaasut perusuttullu naammannginnamik. Taava naggataagut killissimavugut allatut ajornartumik avataaninngaanniit tikisitsisariaqarluta, Susanne Marie Knudsen oqarpoq.
Kinamiunilli sulilersitsisimaneq SIK-p siulittaasuata, Jess G. Berthelsenip, iluarinngilaa. Royal Greenland nunatsinni suliffissaaleqisut sulilersinnissaannut iliuuseqarnerusariaqartoq taanna isumaqarpoq.
Akissarsiat qaffakkusukkai
Jess G. Berthelsen naapertorlugu suliffissuit suliffigissallugit pitsaanerpaajunngillat. Suliffissuillu suliffigilernissaasa kajuminnarnerulersinnissaannut, soorlu akissarsiat qaffannerisigut, Royal Greenland iliuuseqarnerusariaqarsoraa.
- Isumaqatigiinnialerpugut, taamaattumik isumaqarpunga, Royal Greenlandi aningaasanik qaavatigut annertunerusunik tunisinissamut piumassuseqarnerusariaqartoq, Jess G. Berthelsen oqarpoq.
AAMMA ATUARUK Kiinamiut suliartortut inissinneqartut
Tamattali suliartortarnissamut akisussaaffeqartugut, taassuma nassuerutigaa. Maniitsumili suliffissuup ukiorpassuarni matoqqanera nunatsinneersunik aalajaatsunik sulisorisaqarnissap unammillernarneranut pissutaasoq Jess G. Berthelsen isumaqarpoq. Taannami naapertorlugu suliffissuup matunnginnerani sulisut aalajaatsuupput.
- Maannakkullu aatsaat aallarnisaqqilerput. Qularutiginngilaralu sungiuteqqissagaat, assersuutigalugu Maniitsumi suliffeqarfik aalaakkaanerusumik ingerlaqqilerpat, SIK-p siulittaasua, Jess G. Berthelsen, oqarpoq.
AAMMA ATUARUK Kinamiut 38-t Royal Greenlandimi tunisassiorneq ataavartissagaat