Royal Greenland Asiameersut 27-t sulilersinneqartut
Royal Greenland aalajaatsunik nioqqutissiorfiusuni sulisoqarumalluni Kinamiunik 18-inik filippinerinillu qulingiluanik sulilersitsisoq, attaveqarnermut sulisoqarnermullu pisortap Jens K. Lyberthip oqaatigaa.
- Peqqutaavoq, aalisarneq tunisassiornerlu ingerlaannassasut kissaatigigatsigu. Ajoraluartumik piffissap ilaani sulisussaaleqisarpugut taamaalillutalu tunisassiorneq aalisarnerlu unitseqattaartariaqassallugit, Jens K. Lyberth oqarpoq.
AAMMA ATUARUK Kiinamiut suliartortut inissinneqartut
Kinamiut ukiuni marlunni sulinissamik isumaqatigiissuteqartut 36-t Royal Greenlandip Maniitsumi, Ilulissani, Uummannamilu suliffiini sulisooreerput.
Aalajaatsuunngitsunik sulisorisaqarneq pissutaalluni naammattunik sulisussaqarniarneq unammillernartartoq pisortap oqaatigaa. Aalajaatsumilli sulisartorpassuaqartoq, Jens K. Lyberthip erseqqissaatigaa.
- Taakkulu suleqatit suliartunngitsoortaleraangata qasutinneqartarput, Jens K. Lyberth oqarpoq.
Nunatsinni suliffissaaleqisoqarnerani nunanit allanit sulisussarsiortoqartarnera inuiaqatigiittut ajorsarnertut SIK-p siulittaasuanit, Jess G. Berthelsenimit, oqaatigineqartareerpoq. Sulisunut nunatsinneersunut nunanit allaneersunullu atugassaritinneqartut assigiinngitsut, suliffissuillu tunisassiassaarukkaangata nunatsinneersut angerlartinneqartuusartut Jess G. Berthelsen tusagassiuutinut nalunaarummi allappoq.
AAMMA ATUARUK Kinesere vækker både glæde og kritik
Taamaattoqarnerali pissuteqartoq, Royal Greenlandip sulisoqarnermut immikkoortortaqarfia KNR-imut mailikkut allappoq.
- Kinamiut filippinerillu tamarmik Kalaallit Nunaanniinnerminni sapaatit akunneranut 40 tiiminik sulisarnissaannik qulakkeerunneqarput. Taamaanngippat tamaani sulilersissinnaanavianngilagut, angerlartitaasoqartillugulu sulisut aalajaannerpaat suminngaanneerneq apeqqutaatinnagu kingulliullutik angerlartinneqartarput. Angerlartitsisariaqaraangatta sulisorisat aalajaatsuunngitsut siulliullutik angerlartinneqartarput, Royal Greenlandimit allapput.
AAMMA ATUARUK Royal Greenland kinamiut pillugit innuttaasunik ataatsimiisitsiniartoq
Kalaallit inuusuttut sungiusarneqartariaqartut
Inuit Ataqatigiinneersoq Mimi Karlsen isornartorsiuisunut ilaavoq.
- Uangaana isumaqartunga, Royal Greenlandip kommuni peqatigalugu pikkoriffiginerusariaqaraa, inuusuttatta nunatsinneereersut suliffimmi aammalu fabrikkini suliffissuarni sulinissamut sungiusarluarneqarnissaat, Mimi Karlsen oqarpoq.
Jens K. Lyberthili naapertorlugu nunatsinneersunik sulilersitsinissaq unammillernarsinnaasarpoq.
- Sulisussat pisariaqartitagut maani nunatsinni pissarsiarisinnaagutsigit ajunnginnerujussuussagaluarpoq. Kisianni taamaanngimmat, amigaateqartaratta, avataaninngaanniit tikisitsisariaqartarnerput, sulisussarsiorneq taanna ajornakusoorneruvoq akisunerullunilu, Royal Greenlandimi attaveqarnermut sulisoqarnermullu pisortaq Jens K. Lyberth taama oqarpoq.
Royal Greenland Tunumi tunisassiornerup nalliuteruttorfiani aamma tikisitsinissamik pilersaaruteqarpoq.
