Shalmi: Politikerit suliartortitsisarneq ajornannginnerulersittariaqarpaat

Nuummi suliffeqarfiit sulisussanik amigaateqarput, tamannalu ineriartornermut kigaalaqutaavoq. Taamaammat politikerit nunatsinnut sulisussanik tikisitsiniarnerup ajornannginnerulersinnissaa ilaqutariinnullu tulluartumik politikki inuit meeqqiorluarsinnaanissaanik qulakkeerisussaq sulissutigissavaat. Sermersooq Business Councilip siulersuisuini siulittaasoq taama isumaqarpoq.

Taama oqaaseqarnera Sermersooq Business Councilip Nuummi suliffeqarfiit 191-it akornanni misissueqqissaarneranik tunngaveqarpoq.

- Sulisussanik piukkunnartunillu amigaateqartoqarpoq. Suliffeqarfiit nioqquteqarfiillu tamarmik akornanni tamanna takussaavoq, Sermersooq Business Councilimi siulittaasoq, Martin Sandy Shalmi oqarpoq.

Siunnersuisoqatigiit Kommuneqarfik Sermersuumi inuussutissarsiorneq pilersitinerlu taperserniarlugit sulissuteqarput, siunnersuisoqatigiillu misissuinerminni suliffeqarfippassuit assigiinngitsut suliffimmi ineriartortitsinermillu unammillernartitaannik apersuiffigai.

Shalmi: Sulisussarsiniarneq ajornarnerulersikkunnaarsiuk

Shalmip sulisussanik pissarsiniarneq unammillernarnerpaat ilaanniittoq oqaatigaa:

- Sumut tamaannga qiviaraanni sulisusassanik amigaateqartoqarpoq.

Taamaammat politikerit nunatsinnut sulisussanik tikisitsiniarnermut ajornarsaarunnaartariaqartut Shalmi isumaqarpoq:

- Piukkunnartunik arlalinnik sulisoqarnikkut suliaqarnerusinnaangaatsiarpugut, ineriartornerutitsisinnaavugut, nunarput pisuunerulersissinnaavarput akileraarutitigullu isertitaqarnerusinnaalluta – tamanna taarsiullugu Inatsisartut piffissaq ineriartornermik pitsaaliissutigaat, Shalmi oqarpoq. Inatsisimullu allannguut ukiaq ataatsimiinnermi naammassineqartoq ilaatigut innersuussutigalugu.

Allannguutip suliffeqarfiit qinnuteqarnermit oqartussat ullut 14-inngortinnagit qisuariaateqannginneratigut nunanit allaniit sulisussanik pissarsinissamut qinnuteqarsinnaaneranut periarfissaat peerpaa.

Shalmi naapertorlugu tamanna aqqut eqqortuunngilaq. Taassuma inunnik amerlanerusunik nunatsinnut kajumitsitsilerneq aaqqiissutissaasoraa.

- Nunanilermut politikkilioritsi inunnillu amerlanerusunik maanngartitsigitsi. Kisianni aamma ilaqutariinnut meeraqqortunerulernissamut pilerinartumik politikkilioritsi.

Martin Sandy Shalmip Sermersooq Business Councilip misissueqqissaarnera nunatsinni siunissami siammarterneqarumaartoq neriuutigaa.