Kinamiunik suliunnaarsitsineq SIK-p taperseraa

Royal Greenlandip Kinamiunik sulisuminik nunaminniiginnaqqusinera eqqortuliorneruvoq. SIK-p siulittaasua, Jess G. Berthelsen taama isumaqarpoq.
- Isumaqarpunga taamatut aalajangerneq pissusissamisoortoq. Siullermik, sulisut toqqissisimanissaat pillugu. Kisianni taannaannanngitsoq, inuiaqatigiit tamaasa isigalugit aamma toqqissisimanissaat isumaqarpunga pissusissamisoortoq taamatut aalajangerneq, SIK-mi siulittaasoq Jess G. Berthelsen taama oqarpoq. Assi © : Royal Greenland
februaarip 27-at 2020 06:22

Royal Greenlandip Maniitsumi Ilulissanilu tunisassiorfiini sulisut nualluummik coronavirusimik tunillatsinnissamik ernumanerat toqqissisimannginneeraaneq pissusissamisoorpoq.

Royal Greenlandip sulisuisa Kinameersut nunatsinnut uteqqinnginnissaannik aalajangernera Sulisartut Sulinermik Inuussutissarsiuteqartut Kattuffiata SIK-p taperserpaa.

AAMMA ATUARUK Royal Greenland sulisunut: Kinamiiginnaritsi

- Isumaqarpunga taamatut aalajangerneq pissusissamisoortuusoq. Siullermik, sulisut toqqissisimanissaat pillugu. Kisianni aamma inuiaqatigiit tamaasa isigalugit toqqissisimanissaat pillugu isumaqarpunga pissusissamisoortoq taamatut aalajangerneq, SIK-p siulittaasua Jess G. Berthelsen oqarpoq.

Kinamiut pineqartut coronavirusimik tunillatsissimanngitsut, Royal Greenlandimiit ilisimatitsipput. Taamaakkaluartorli nualluutip nunatsinnut tuniluunnisaanik SIK-minngaaniit kissaateqartoqanngilaq.

- Eqqorneqassagutta aamma peqqinnissaqarfik qanoq piareersimaffigineqarnersoq tassani apeqquserneqartariaqarmat.

Nualluut tuniluuttoq nunatsinnut anngutissagaluarpat nappaatit tunillaattartut pillugit ataatsimiititaliaq nunatsinnilu nakorsaaneqarfik piareersimallutik siusinnerusukkut nalunaarutigivaat.

Kalaallit Kinamiullu sulisut atorfissaqartinneqartut

Kinamiut qulingiluat Royal Greenlandimi ukiuni arlalinni sulisuupput, marluk Maniitsumi arfineq-marlullu Ilulissani.

Corona virusip Kinami siaruaatileruttornerani taakku Kinamut ukiortaarsioriartorput.

Sulisoqarnermi immikkoortortaqarfimmi tullersortaata, Søren Damgaard Olsenip, oqarnera naapertorlugu pisut pillugit nakorsaaneqarfik Royal Greenlandip isumasiortarpaa. Kinamiulli siunissami nunatsinnut suliartoqqissinnaanerat mattunneqanngitsoq taanna oqarpoq.

- Oqarfigaagut massakkut uagutsinni atorfeqarnerat unikkallartariaqartoq, corona virus peqqutaalluni. Taava sulisugut taakkua aamma oqarfigaagut qanimut corona virus malinnaaffigissallugu, taava atassuteqarfigiinnassavagut. Aamma neriorsorpagut corona virusi unissagaluarpat immaqaluunniit annikillerujussuassagaluarpat, taava nunatsinnut suliartoqqissinnaanissaat periarfissaassasoq.

Kinamiut Royal Greenlandimi sulisut nunatsinni SIK-mut ilaasortaanersut siulittaasup oqaatigerusunngilaa.

- SIK-mi ilaasoratappata annaasaqannginnisssaat soorunami qulakkeeerniassavarput.

AAMMA ATUARUK Coronavirusip Royal Greenlandimi sulisut apuutsinnaveerai

Kinamiut qulingiluat suliunaarsinneqarnerata kingunerisaanik Royal Greenland tunisassiorfimmi sulisussanik nutaanik pisariaqartitsilerput, tamannali SIK-mit ammaffigineqarpoq.

- SIK-p kissaatigiuarpaa sapinngisamik nunaqavissut suliffeqarfinni sulisinneqarnissaat.

Nunatsinni sulisitsisut kattuffiata naatsorsuinerata kingulliup takutippaa, nunatsinni aalisakkanik tunisassiorfiit 2019-imi sulisussanik 333-inik, tassalu atorfiit sisamararterutaannik amigateqartoq.

- Neriuppunga taanna iluatsinneqassasoq, soorunami aamma uagut suleqataarusuppugut nunatsinninngaaniit taarserneqarsinnaanerat eqqarsaatigalugu.

Royal Greenlandip aalajangernera Sulisitsisut oqaaseqarfigerusunngilaat.