Coronavirusip Royal Greenlandimi sulisut apuutsinnaveerai
Royal Greenlandimi sulisut arfineq marluusuk nuaalluutip coronavirusip siaruaannera peqqutaalluni Kinamiit aallarnaveertut, suliffeqarfissuaq KNR-imut ilisimatitsivoq.
Taakkunannga tallimat Ilulissanut marlullu Maniitsumut suliartortussaapput.
Kiinameersut arfineq marluk taakkua nunaminni sulinngiffeqareerlutik, Royal Greenlandip suliffeqarfiutaanni sulissallutik nunatsinniilereertussaagaluarput. Coronavirusilli siaruaassuunneranik peqquteqartumik suliffimminnut utersinnaanngillat.
- Coronavirusimik tunillatsissimasumik siumueqqaarneq siorna decembarip ulluisa arfineq-pingajuanni pivoq.
- Nualluut coronavirusi inunnit Kinami illoqarfiit ilaanni Wuhanimi aalisagaarniarfimmiissimasunit - coronavirusillu siaruaaffianiigunarsimasunit - tuniluutilerpoq.
- WHO-p coronavirusi nunarsuarmi peqqinnissakkut ajornartoorfiusutut 2020-mi januaarip ulluisa 30-anni nalunaarutigaa.
- Coronavirusi inummiit inummut attaveqarnikkut tuniluuttartoq nappaammut SARS-imut assersuunneqarpoq.
- Inuit coronavirusimik tunillatsissimasutut nalunaarsukkat 21.000-ngajaapput.
- Coronavirusip Kinami tuniluunnerata saniatigut nunanut allanut 26-nut ilaatigut Sverigemut siaruaassimasutut nalunaarsorneqarpoq.
- Inuit coronavirusimik toqquteqarsimasut 427-upput, taakkunani ataaseq Filippinerini toquvoq, sinnerilu 426-usut Kinami toqullutik.
- Qallunaat qulit Hubeimiit coronaviruseqarfiusumiit Danmarkimut qimagussorneqarput. Qimagussorneqartuni marluk tunillatsissimanermut ilimanaateqartutut nalilerneqarmata angerlarsimaffimminnit aneqqusaajunnaarallartitaapput.
Paasissutissanik pissarsiffik: Statens Serum Institut, Det Europæiske Center for Sygdomsforebyggelse og -kontrol, DR
Tassalu ukiuunerani suliassakippoq, Kinamiulli sulisut tikeqqikkunik nalunaaquttap akunnerini amerlanerusuni sulisinnaapput.- Tassa ulapinnerpaaffimmiinnginnatta massakkut, taamaammat tunisassiorfimmi allatulaaq aaqqissuussinikkut suliat suliarineqarsinnassut paasinikuuarput. Paasinikuuarput kinguaattoorfiunavianngitsut, Royal Greenlandimi attaveqaqatigiinnermi ingerlatsisoq, Inga Dora Markussen oqarpoq.
SAS-ip angallassinnginnissani sivitsoraa
Sulisut Kinameersut nunatsinnukarsinnaanginerannut timmisartuutileqatigiiffiup SAS -ip Kinamiit Kinamullu angallassinerit januaarip ulluisa 30-aniit februaarip ulluisa qulingiluaat tikillugu taamaatitsiinnarneranik peqquteqarpoq.
SAS ullumi marlunngornermi nalunaarpoq, angallassinnginneq februaarip 29-anut sivitsorneqartoq.
AAMMA ATUARUK Ataatsimiititaliaq sulilerpoq: Coronavirusip nunatsinnut annguteratarnissaanut upalungaarsimavugut
Nunatsinni angallanneq nappaatip tuniluunneranik peqquteqartumik suli killilersorneqalinngitsoq, nappaatit tunillaattartut pillugit ataatsimiititaliaq sapaatip akunnerata naanerani ilisimatitsissutigaat.
Ataatsimiititalialli nunat tamalaat akornanni peqqinnissaq pillugu suliniaqatigiiffik, WHO, malinnaavigaa, taamaammallu nunanit allaneersut suli maannamut nunatsinnukaqqusaajunnaanngillat.
Maannamut nappaammik tunillatsissimasut 20.626-it nalunaarsorneqarput, 427-llu nappaammik toqquteqarsimasutut.
Tamannalu Royal Greenlandip sulisuisa ernumanartippaat.
- Soorunami allatuulli annilaangagineqarsinnaavoq, tuniluuttarneq taamaattoq paaseqqaarlugu tuniluussinnaasoq, ernumatitsinikuuvoq.
Inga Dora Markussen oqarpoq nangillunilu:
- Ersarissarneqartariaqassooq, uagut nakorsaaneqarfimmik qanimut suleqateqarpugut. Taamaattumik aamma taanna eqqissisaataasinnaavoq.
Aalisakkanik tunisassiorfiit pisumik malinnaapput
Nunatsinni aalisakkanik tunisassiorfiit marluk Polar Seafood aamma Royal Greenland nioqquteqarnertik pissutigalugu Kinami pisut nakkutigaat. Polar Seafoodimi ernumallutik, kisianni pisut suliffeqarfimminnut sunniuteqasanersut oqaatigissallugu siusippallaartoq, siulilersuisut siulittaasuat, Henrik Leth, Sermitsiaq.AG-mut siusinnerusukkut oqarpoq.
AAMMA ATUARUK Kinap coronavirusimut suliniuteqarnermut ajornartorsiorsimanini nassuerutigigaa
Royal Greenlandimilu pisortaaneq, Mikael Thinghuus, aamma pisut suliffeqarfimmik Kinami tunisarpassuinut kalluarneqarsinnaanera eqqumaffigigitsik, tamatumunngali oqaaseqarnissaq suli siusippallaartoq, fødevarewatch.dk-mut siusinnerukkut oqarpoq.
