Ataatsimiititaliaq sulilerpoq: Coronavirusip nunatsinnut annguteratarnissaanut upalungaarsimavugut
Nunatsinni oqartussat coronavirusip nunatsinut annguteratarnissaanut upalungaarsimapput.
Nappaatit tunillaattartut pillugit ataatsimiititaliaq, coronavirusip nunatsinnut annguteratarnissaanut upalungaarsimalertoq, taama nassuiaavoq.
- Nappaatit tunillaattartut pillugit ataatsimiititaliaq coronaviruseqartumik Kalaallit Nunaanni siumuisoqaratarnissaanut qanoq iliuusissanik najoqqutassiorpoq, ataatsimiititaliami siulittaasoq, Svend Foldager, oqarpoq.
- Coronavirusimik tunillatsissimasumik siumueqqaarneq siorna decembarip ulluisa arfineq-pingajuanni pivoq.
- Nualluut coronavirusi inunnit Kinami illoqarfiit ilaanni Wuhanimi aalisagaarniarfimmiissimasunit - coronavirusillu siaruaaffianiigunarsimasunit - tuniluutilerpoq.
- WHO-p coronavirusi nunarsuarmi peqqinnissakkut ajornartoorfiusutut 2020-mi januaarip ulluisa 30-anni nalunaarutigaa.
- Coronavirusi inummiit inummut attaveqarnikkut tuniluuttartoq nappaammut SARS-imut assersuunneqarpoq.
- Inuit coronavirusimik tunillatsissimasutut nalunaarsukkat 17.383-iupput.
- Coronavirusip Kinami tuniluunnerata saniatigut nunanut allanut 24-nut ilaatigut Sverigemut siaruaassimasutut nalunaarsorneqarpoq.
- Inuit coronavirusimik toqquteqarsimasut 362-iupput, taakkunani ataaseq Filippinerini toquvoq, sinnerilu 361-iusut Kinami toqullutik.
- Qallunaat qulit Hubeimiit coronaviruseqarfiusumiit Danmarkimut qimagussorneqarput. Qimagussorneqartuni marluk tunillatsissimanermut ilimanaateqartutut nalilerneqarmata angerlarsimaffimminnit aneqqusaajunnaarallartitaapput.
Paasissutissanik pissarsiffik: Statens Serum Institut, Det Europæiske Center for Forebyggelse af og Kontrol med Sygdomme, DR
Peqqinnissamut Isumaginnittoqarfik Danmarkimi Statens Serum Institut suleqatigalugu inuit coronavirusimik tunillatsissimanerannik misissuisinnaasoq, peqqissutsimut naalakkersuisup, Martha Abelsenip, paragraffi 37 naapertorlugu apeqqummut akissummini nassuiarpaa.
AAMMA ATUARUK WHO: Virusi nunarsuarmi peqqinnissakkut ajornartoorfiuvoq
Peqqinnissamut Isumaginnittoqarfik tunillatsissimasunik tunillatsissimasorineqartunillu nakorsaanermut ilitsersuummik aamma apuussivigineqarpoq. Tunillatsissimasumillu nakorsaanermi atortunik soorlu aatsorneqarnissamut illersuutinik peqarnissaa qulakkeerneqareerpoq.
Nunatsinnut annguteratarsinnaanera ilimanaateqarpianngitsoq
Coronavirusilli nunatsinnut annguteratarsinnaanera ilimanaateqarpianngittuarsinnartoq, peqqissutsimut naalakkersuisup aamma nappaatit tunillaattartut pillugit ataatsimiititaliap uppernarsarpaat.
- Kalaallit Nunaanni coronavirusimik tunillatsissimasoqarneranik suli pasinartoqaranilu virusimik taassuminnga nutaajusumik tunillatsissimasunik suli siumugaqanngilagut, coronavirusilli tuniluunnerata ingerlarnga malinnaavigeqqissaarparput, nunatsinni nakorsaaneq ataatsimiititaliami aamma ilaasortaasoq, Henrik L. Hansen, oqarpoq.
Nappaat peruluut coronavirusi navianartoq aammali taama navianartiginngitsoq, nakorsaanerup nassuiarpaa.
- Maannamut misilittakkat takutippaat tunillatsissimasut tamangajammik aaqqeqqittartut, Henrik L. Hansen.
Coronavirusi inunnik virusimik taassuminnga tunillatsissimasunik attaveqarnikkut tuniluuttarpoq, taamaattumik tuniluunnissaa taama aarlerinartiginngilaq. Ingammik ilaqutaasut peqqinnissaqarfinnilu sulisut aatsorneqartarput, nakorsaaneq nassuiaavoq.
Kinamiunik nunatsinnukartoqassanngitsoq
Nappaatit tunillaattartut pillugit ataatsimiititaliap coronavirusip siaruaannerata ingerlarnga ataavartumik malinnaavigaa, coronavirusillu nunatsinnut annguteratarnissaanut pitsaaliunermut sunik suliniuteqartoqassanersoq nammineq aalajangigassaraa.
Ataatsimiititaliap nunat tamalaat akornanni peqqinnissaq pillugu suliniaqatigiiffik, WHO, malinnaavigaa, taamaammallu nunanit allaneersut suli maannamut nunatsinnukaqqusaajunnaarsinneqanngillat.
AAMMA ATUARUK Nappaatit tunillaattartut pillugit ataatsimiititaliaq corona-virusimut isummissaaq
Kinamiilli timmisartuussinerit unitsinneqarallarnerat pissutigalugu Kinamiut nunatsinnut suliartorsinnaanngitsut, ataatsimiititaliap ilisimatitsissutigaa.