Nappaatit tunillaattartut pillugit ataatsimiititaliaq corona-virusimut isummissaaq
Corona-virusip nutaap (2019-nCoV) nunatsinni tunillaassuutilernissaa suli ilimanarpianngikkaluartoq, nunarsuup sinnerani siaruaakkiartormat nappaatit tunillaattartut pillugit ataatsimiititaliaq sulilerpoq. Nunatsinni nakorsaaneq, Henrik Hansen taama paasissutissiivoq.
Ataatsimiititaliaq sisamanngornermat suli aalajanginngilaq, nunatsinniilli nunatsinnullu angallanermut immikkut piareersaasoqarnissaanut isummissasoq, nunatsinni nakorsaaneq oqarpoq.
- Kissarneqarneq, panertumik quersorneq ilaatigullu anernikilliorneq puallunnermullu takussutissaqarneq nappaammik tunillatsissimanerup ersiutigai.
- Inuit tunillatsinnerminnik ajornerulersut maannamut utoqqaanerullutillu peqqissutsikkut sanngiinnerusuupput.
- Nappaammut virusimut suli akiuussutissaqanngilaq. Ilisimatuut qassiiusut nappaammut akiuussutissamik ineriartortitsileruttorput. Ilisimatuullu akiuussutissaasinnaasup siulliup qaammatit pingasut missaat qaangiuppata misileraatigineqarsinnaalernissaa neriuutigaat.
- Kinami nappaalasut saniatigut Tysklandimi, Australiami, Frankrigimi, Japanimi, Malaysiami, Nepalimi, Canadami, Singaporemi, Korea Kujallermi, Taiwanimi, USA-mi, Saudi-Arabiami, Thailandimi, Cambodjami, Vietnamimi, Finlandimi Tibetimilu tunillatsissimasut siumorneqarput.
- Nunat qassiiusut nappaatip tuniluunnerata annikinnerulersinnaa pissutigalugu angalasut immikkut ittumik nakkutigilerpaat.
- Kinamiut illoqarfiat, Wuhan, nunallu immikkoortuani Hubei-imi illoqarfiit allat killilersorlugit matoqqatinneqarput. Innuttaasut 50 millioninit amerlanerusut killilersuinermit eqqugaaqqapput.
- Inuit tunillaaffiusinnaasunit nunatsinnut tikittusat pillugit immikkut piareersaassutissat tamarmik Kalaallit Nunaata nappaatit tunillaattartut pillugit ataatsimiititaliamit suliarineqassasut oqarsinnaavunga, Henrik Hansen oqarpoq.
AAMMA ATUARUK Nakorsaaneqarfik nualluut pillugu: Pilersaaruteqarpoq
Nunatsinnit nunatsinnullu angallanermut tunngasuni iliuuseqartoqassanersoq, corona-virusilu nunatsinni tunillaassuutinnginniassammat immikkut piareersaasoqassanersoq,
Nappaatit tunillaattartut pillugit ataatsimiititaliap nalilissavaa.
Sisamanngornermili suli aalajangiinatik, Henrik Hansen oqarpoq.
- Tunillatsissimasinnaasunik avataanit tikittoqannginnerani aalajangiissaagut, nunatsinni nakorsaaneq oqarpoq.
Taanna ataatsimiititaliami ilaasortaavoq, peqqissutsimullu tunngasuni siunnersortaalluni. Nersutit nakorsaasa pisortaat, akitsuusersuiffimmit sinniisut kommuniniillu sinniisoq ataatsimiititaliami ilaasortaapput, politimesterilu siulittaasuulluni.
AAMMA ATUARUK Naalakkersuisut: Corona-virusip nunatsinnut anngunnissaa ilimanarpallaanngilaq
Inuit Ataqatigiinneersup Mimi Karlsenip Royal Greenlandimit sulisut Kinamiut sulinngiffeqareerlutik nunatsinnut utertut oqartussanit arajutsisimaneqannginnissaat piumasaaraa. Kikkut maanna Kinamiittut qaqugulu utissanersut Nunatsinni nakorsaaneqarfiup nalunngikkaa nunatsinni nakorsaaneq eqqississaavoq.
Aamma taakkununnga immikkut piareersaasoqassanersoq nappaatit tunillaattartut pillugit ataatsimiititaliamit isummerfigineqarumaartoq, taanna oqarpoq.
- Pissutsilli maanna ima ilungersunarsitigilermata nappaatip pinartutut suliarineqarnissaata nunanit tamalaanit oqaatigineqarnera nappaatit tunillaattartut pillugit ataatsimiititaliap maanna ilanngutinneqarneranut pissutaanerpaajuvoq. Assersuutigalugu aamma Danmarkimi taamaappoq, Henrik Hansen oqarpoq, ataatsimiititaliamilu nunani tamalaani pisunut malinnaaniarluni nunanit allaneersunik suleqateqarlutik oqaluttuarluni.
AAMMA ATUARUK Hannah Shanghaimi: Coronavirus peqqutigalugu Spaniamut nuulerpunga
Virusip nunatsinni tunillaatilernissaa ilimanarpianngitsoq, nunatsinni nakorsaaneqarfiup siusinnerusukkut nalunaarutigaa. Taamalu naliliineq allanngunngilaq.
- Corona-virusimit tunillatsissimasumik nunatsinnut tikittoqarsinnaavoq, ilimanaalli mikisutut nalilerparput, Henrik Hansen oqarpoq.
Nunatsinni nakorsaaneqarfik tunillatsittoqarsimatillugu qanoq iliornissamut ilitsersuummik peqqinnissaqarfimmut sapaatit akunnerata siuliani nassiussivoq. Nunanili allani oqartussanit paasissutissat kingulliit naapertorlugit ilitsersuut nutartersimallugu, nunatsinni nakorsaaneq oqarpoq.