Nakorsaaneqarfik nualluut pillugu: Pilersaaruteqarpoq
![](/sites/default/files/styles/image_934x467/public/article_images/20200124-073532-l_74mb.jpg?itok=7AUWBQzZ)
Nappaat nualluut corona-virus nunatsinni tuniluutilissagaluarpat nunarput piareersimavoq.
- Piareersimavugut qanoq qisuariassanerluta nunatsinnut apuuteriasaassappat, Nunatsinni Nakorsaaneqarfimmi Immikkut ilinniagalittut nakorsaq Paneeraq Noahsen oqarpoq.
AAMMA ATUARUK Naalakkersuisut: Corona-virusip nunatsinnut anngunnissaa ilimanarpallaanngilaq
Nualluutip nunatsinnut anngunnissaa ilimanaateqarpallaanngilaq. Anngussimagaluarpallu tuniluunnissaanut aarlerinaataa suli annikitsoq, taassuma oqaatigaa.
Nualluummik tunillatissimasut tamangajammik Kinami tunillatsissimassasut imaluunniit Kinami tunillatsissimasumik ilagisaqarsimassasut, nakorsap oqaatigaa.
Nualluutilli pinngitsoortinneqarnissaa qulakkiivinneqarsinnaanngitsoq, Paneeraq Noahsen oqarpoq.
AAMMA ATUARUK Nualluummit coronavirusimit Kinami toqquteqartut maanna 80-inngortut
Nualluummik tunillatsissimanermik arlaatigut pasitsaassaqartoqarpat Peqqinnissaqarfik attavigineqassaaq.
- Tunillatsissimasorisoq peqqinnissaqarfimmut sianissaaq taamaalilluni takkuttussap apuunnissaanut assersuutigalugu utaqqisarfik inuerutinneqassaaq imaluunniit apuuttussap tunillaanissaa pinaveersaarlugu inimik toqqaannartumik iserfissaqarnissaa piareersarneqassaaq, Paneeraq Noahsen oqarpoq.
Corona-virusimit napparsimasoq inimut immikkoortinneqassaaq, nunatsinnilu tamani immikkoortitsiveqartoq, nakorsaq oqarpoq.
- Tassanngaanniillu toqqusaavaninngaanniit qiseq tiguneqassaaq, taannalu Danmarkimut tuaviortumik misissugassanngorlugu nassiunneqassalluni.
AAMMA ATUARUK Coronavirusimut akiuussusiorneq ukiumik ataatsimik sivisussuseqarsinnaasoq
Upalungaarsimanermut pilersaarut arlalinnik, soorlu Air Greenlandimik, suleqateqarluni suliaasoq, Peqqissutsimut Aqutsisoqarfillu pisoqaraangat ingerlaavartumik ilisimatitsisarpoq.
Immikkualuttortai oqaluttuariuminaatsut
Taakkuli annerusumik oqaluttuarisinnaanagit Paneeraq Noahsen oqarpoq.
- Uku pilersaarutit assigiinngitsut oqartussaqarfiit suliffeqarfiillu suleqatigalugit piareersarnikuugatsigit itisilerujussuarlugit saqqummiussinnaanngilagut. Kisianni pisoqassagaluarpat piareersimavugut.