Coronavirusimut akiuussusiorneq ukiumik ataatsimik sivisussuseqarsinnaasoq
Virusimut nutaamut tassa coronavirusimut akiuussusiorneq sivikinnerpaamik ukiumik ataatsimik sivisussuseqarsinnaavoq. Nunani tamalaani akiuussusiortartut kattuffiat, Gavi, taama naliliivoq.
Ilisimatuut coronavirusip qanoq siaruaatsigisinnaaneranik naliliinissaminnut nappaat taanna pillugu suli ilisimasakippallaartut, Gavisimi qullersap, Seth Berkeleyp oqaatigaa.
- Coronavirusimut akiuussusiornissamut misissuinerit qaammaterpaalunnik sivisussuseqassaaq, virusimullu tassunga akiuussusiorneq sivikinnerpaamik ukiumik ataatsimik sivisussuseqassalluni, Seth Berkeley oqarpoq.
AAMMA ATUARUK Wuhanimi innuttaasut illoqarfimminniit qimaguteqqusaanngitsut
Inuit coronavirusimik pualluuteqalersitsartumik - Kinami illoqarfissuarmi Wuhanimi aalisakkanik niuerfissuit ilaannit siaruaassimassangatinneqartumik - tunillatsissimasut maannamut 571-iupput. Kinami oqartussat oqarnerat naapertorlugu inuit maannamut 17-it coronavirusimik toqquteqarsimapput.
- Ilisimatuut coronavirusip sananeqaataata ilisarnaataanik suussuseereersimanerat tusarluarnaqaaq, tamannalu nunani tamalaani akiuussusiortartorpaaluit virusimut tassunga akiuussusiorsinnaanngornerannik kinguneqarpoq, Seth Berkley oqarpoq nangillunilu:
- Coronavirusimut akiuussusiorneq nappaatinut soorlu malariamut HIV-mullu akiuussusiornermit ajornannginneruvoq.
