Politikki Inuussutissarsiutit

Immikkut ilisimasalik: Kinamiut Kalaallit Nunaanni aningaasaliinerat USA-mit alaatsinaanneqarpoq

Kinamiut ingerlatseqatigiiffiata Shengse Resourcesip Greenland Minerals and Energymi, GME, piginneqataassutit 12,5 procentiinik sapaatit-akunnerata siuliani pisineranik nutaarsiassaq Nunatsinnut Danmarkimullu ajornartorsiutinik pilersitsisinnaavoq. Aviisi Politiken taama allaaserisaqarpoq.

Allattoq Simon Uldum -

septembarip 28-at 2016 10:23

Immikkut ilisimasallit aviisip oqaloqatigisimasai arlallit naapertorlugit, Nunatta aatsitassaatai pillugit Danmark naalagaaffiit pillugit politikkikkut ajornartorsiuleratarsinnaavoq.

- Matumani pisup USA-mit maluginiarneqarsimanissaa qularutiginngiluinnarpara, kontreadmirali Danmarkimilu illersornissamut tunngasunut akademimi pisortaq, Nils Wang, Politiken-mut taama oqarpoq.

Kinamiut ingerlatseqatigiiffiata allap, General Nicep, ingerlatseqatigiiffimmik Nuup eqqaani Isukasiani savinissamik piiaanissamut akuersissuteqartumik siorna pisisimanera aamma eqqaavaa. Suliniutit taakku marluk, Isukasianiittoq Kuannersuarniittorllu, Nunatsinni piiaaviliornissamut periarfissagissaarnersaapput.

Aamma atuaruk Immikkut ilisimasalik: Taamaammat Kinamiut aningaasalersuiniarnerat Kuannersuit pillugit tusarluarnartuuvoq

Nunarput pilersaarusiornikkut USA-mut pingaaruteqartoq

Politikenip aamma Damien Degeorges oqaloqatigisimavaa. Taanna suliffeqarfiutini Degeorges Consulting aqqutigalugu Issittumi aningaasalersuineq pillugu siunnersuisartuuvoq Nunatsinnilu aatsitassarsiornerup oqallisigineqarnera ukiuni arlalinni malinnaaffigisimallugu. Taassumalu Nils Wang isumaqatigaa:

- Kinamiut Kalaallit Nunaanni aningaasalersuinikkut amerikamiunik europamiunillu unammillerniassappata, suliniummi matumani pineqartumi pisinnaavoq, Politikenimut taama oqarpoq.

- Kalaallit Nunaat pilersaarusiornikkut USA-mut pingaaruteqarpoq, aamma Kalaallit Nunaata nunanik pissaanilissuarnik Kinatut ittunik isumalluuteqalinnginnissaa Washingtonimi aqutsisut kissaatigaat. Suliniutillu Kuannersuarni ingerlanniarneqartup Kalaallit Nunaata ineriartortinneqarneranut pingaaruteqarluinnarnissaa qularutissaanngilaq, Danien Degeorges oqarpoq.

Aamma atuaruk Aatsitassarsiorfik Shanghaiimeersoq GME-mut ilannguttoq

Kinamiut ingerlatseqatigiiffiat Shenghe Resources, saffiugassanik qaqutigoortunik piiaanermik tunisassiornermillu immikkut suliaqartuuvoq, Kinamilu ingerlatseqatigiiffippassuit assingalugit naalakkersuisunut qanittumik inissisimalluni. Ingerlatseqatigiiffimmi piginneqataassutinik pigisallit annersaat tassaavoq Kinami ilisimatusarnikkut sullissivik naalagaaffimmit pigineqartoq, taassuma piginneqataassutinik 20 procentii sinneqartunik, 13 milliardit koruunit missaannik nalililinnik, piginnittuuvoq.