Immikkut ilisimasalik: Taamaammat Kinamiut aningaasalersuiniarnerat Kuannersuit pillugit tusarluarnartuuvoq

Kinamiummi aningaasatigut iluanaaruteqarnissanissamisulli Kinami suliffeqarfinnut aatsitassanik nioqquteqarsinnaanissartik soqutigitigaat.

- Taamammat piffissaq ungasinnerusoq eqqarsaatigalugu suliniummut peqataassapput, aamma aatsitassat akii iluanaarutaavallaarunnaarlutik appassagaluarpataluunniit.

Ilisimatusarfimmi professori nunatsinnilu piiaaveqarnermik immikkut ilisimasalik, Anne Merrild Hansen, nunatsinni pisuussutit uumaatsut pillugit nalunaarusiami "Kalaallit Nunaannut iluaqutissatut"-mi allaaserinnittoq, taama oqarpoq.

- Aningaasalersuisartoq pisuussutit pinerullugit iluanaaruteqarujussuarnissamillu siunertaqarani akuulerpat, taava tunisassiornerup ingerlaannarnissaa kajunginerussavaat, aamma piffissap ilaani aningaasarsiorneq ingerlalluarpallaanngikkaluarpalluunniit, professori oqarpoq.

Aatsitassanik pisariaqartitsisut

Kinami naalakkersuisut nunami aatsitassarsioqatigiiffiit 2006-imi kajumissaarpaat Kinami tunisassiornermut ingerlalluartumut, nunamilu ukiorpassuarni siuariartortitsisumut, pisuussutinik nunani allani ujarleqqullugit.

Kina nunarsuarmi aatsitassanik piiaaffiunerpaavoq, piiakkalli sukkasuupilussuarmik atortarpaat  uninngasuutigineqartullu taamaallutik nunguttussaassallutik. Taamaammat suliffeqarfiit mobililiornerminnut elektronikkinillu allanik tunisassiornerminnut aatsitassanik pisariaqartitaminnik nunarsuaq tamakkerlugu nioqqutigineqartunik nunani allani ujarlertariaqarput. Maannalu Nunarput Kuannersuillu isiginiarneqalerput.

Aningaasalersuisartorlu nunatsinniilersoq allaanerussuteqarpoq. Anne Merrild Hansen nassuiaavoq, Kinami ingerlatseqatigiiffiit aningaasalersuisartunut sukkasuumik annertuumillu aningaasarsiornissamik siunertaqartunut naleqqiullugit ilaatigut piiaavinnik suliniutit allaanerusumik nalilersuiffigisaraat.

- Piiaavimmik aallartitsinikkut piiaavik atasinnaallualersinneqassaaq, ima paasillugu, piffissap ilaani aningaasarsiornermi ingerlanerliortoqaleraluarpat piiaviup tunisassiornini ingerlatiinnassavaa, pisuussutinik piiaaneq pilersaarummut anginerusumut ilaatinneqarmat, Anne Merrild Hansen taama oqarpoq.

Aamma aningaasarsiorusupput

Professorilli nunatsinneersup aamma oqaatigaa Kinamiut soorunami aningaasarsiornissartik sinneqartooruteqarnissartillu soqutigigaat. Tamannalu saffiugassat qaqutigoortut amerlanersaannik pigisaqarnermikkut angusinnaavaat, taamaaliornikkut kisermaassinertut isigineqarsinnaasumik inissisimalissagamik.  

- Taamaaliornermikkullu akit qaffasissuunissaat aamma qulakkeersinnaavaat. Taamaammat soorunami niuernikkut aningaasarsiornikkullu soqutigisaqarput, aningaasarsiornissamulli soqutigisat kisiisa matumani pineqanngillat, Anne Merrild Hansen taama oqarpoq.

GME-p Kuannersuarni piiaavimmik ingerlatsinissamut akuersissummik tunineqarnissamik qinnuteqaataataata aalajangiiffigineqarnissaanut GME-p allagaatinik inaarutaasunik Namminersorlutik Oqartussanut tunniussinissaa suli amigaataavoq.