Politikki

Kim Kielsenip isornartorsiusut akissuteqarfigai

Naalakkersuisut siulittaasuat Kim Kielsen avaleraasartoortassanik agguaassinermut atatillugu oqallinnermut maanna akuliuppoq, avaleraasartoortassat suliarineqarneranni Naalakkersuisunut pasilliutit eqqunngitsutut nalilerlugit.

Allattoq Mads Lynge

oktobarip 30-at 2015 05:22

- Naalakkersuisunut eqqunngilluinnarlunilu narrunarpoq Aqqaluaq B. Egedemit, Inuit Ataqatigiinneersumit, Hans Enoksenilu Partii Naleqqamit tusagassiorfinnut nalunaarutigineqarmat Naalakkersuisut 40 millionit koruunit missaannik kammalaatersorlutik ikioqatigiissutiginerarlugit pasilliutigalugu, Naalakkersuisut siulittaasuat Kim Kielsen taama oqarpoq.

Naalakkersuisut arlaannaalluunniit imminnut kammalaatinulluunniit sullissinngitsut, taassuma erseqqissaatigaa, 5 koruuniuppat 40 millionit koruuniugaluarpalluunniit, taanna oqarpoq.

AAMMA ATUARUK Illuatungiliuttut: Kim Kielsen nassuiaasariaqalerpoq

Aamma atuaruk Avaleraasartoortassanik agguaassinermi sinaakkutissat Krusep siuttuuffigai

Avaleraasartoortassat agguaanneqarnerat pillugu ingerlatsinermik kukkunersiuilluni misissuisoqarnissaa Naalakkersuisunit siunniunneqartoq, Naalakkersuisut siulittaasuata nalunaarutigaa, misissuinerullu tallimanngormat saqqummiunneqarnera tikkuartorlugu inerniliunneqartut ilaat tassaasoq kammalaatersortoqarsimanngitsoq, inatsisinillu unioqqutitsisoqarsimanngitsoq.

- Aqqaluaq B. Egede Hans Enoksenilu akerlianik oqariartuuteqarunik pasilliutigalugulu Naalakkersuisut kammalaatersorsimallutillu inatsisinik unioqqutitsisimasut, tamanna ilisimasat akerlianik oqariartorneruvoq, misissuinerummi inernera namminneerlutik atuarnissaanut periarfissaqarluarsimapput, Kim Kielsen tusagassiorfinnut nalunaarummi ilaatigut taama oqarpoq.

AAMMA ATUARUK VIDEO Mikael: KNT-p pisassinneqarnera inatsisinik unioqqutitsinerunngilaq

Nutaarsiassami kukkunermik nassaarsimaguit uunga allaffigineqarsinnaavugut.