Killeqanngitsumik atuisoqartalernissaa siunnersuutigineqarpoq
- Tassami ullumikkut annikippallaarpoq qarasaasiap atuarnermi ilinniarnermilu atorneqarsinnaanera, Kaali Olsen Inuit Ataqatigiinnmeersoq taama oqarpoq.
Internetimik killilimmik atuisinnaaneq pissutigiinnarlugu, Nunatsinni atuartut ilinniartullu ilisimasassanik pissarsiniarnissamut periarfissamut, sorpassuarnik periarfissiisumut killersorneqarunnaartariaqarput. Taamaattumik Kaali Olsenip meeqqat atuarfianni ilinniarfinnilu killeqanngitsumik internetimik atuisinnaalernissaq ippassaq siunnersuutigaa, ullutsinnimi internetimik atuiniaraanni assit, filmit, nipit, inoqatinillu oqaloqatiginninnermut atorneqartartut iserfigineqarsinnaanngimmata.
Kaali Olsenillu ilinniartitsisut internettimik atuinerusinnaanngippata kingunissai ernumanartoqartippai.
- Tassami annilaangatigaara internetsi maannagaaq atulinngikkutsigu meeqqat inuusuttullu taassuma teknologip ineriartorneranut kinguaattuullissasut. Taamaalillutillu attaveqatigiinnikkut ilinniarnissamut periarfissaat killeqalissasut, Kaali Olsen oqarpoq.
Taassuma siunnersuutaa Naalakkersuisunit taperserneqarpoq, aamma ilinniartitaanermut naalakkersuisup Mimi Karlsenip akissuteqaammini oqaatigaa, killilersuinerit aningaasanut taamaallaat tunngassuteqartut.
Ukioq manna aningaasanut inatsimmi qarasaasialerinermut 10,4 millionit koruunit atugassiissutaapput, Kaali Olsenillu oqaatigaa, internetimik qanoq atuitigineq apeqqutaatinnagu, aalajangersimasumik akiliuteqartarnissamik TELE isumaqatigiissuteqarfigineqarsinnaassasoq. Taamaalillunimi atuineq apeqqutaatinnagu aalajangersimasumik akeqartitsisoqarsinnaassammat.
Siunnersuut novembarip ulluisa qulingiluaanni aappassaaneerneqassaaq, 'Ungasianillu atuartitsinermut qitiusumik ingerlatsiveqalernissaq' tassunga ilanngunneqassalluni.
Tamatumani ilinniartitsisut atuinissamik ilinniarteqqinneqarnissaat ilaatigut pineqarpoq, taamaalillutik atuartitsinerminni qarasaasialerinermik atuinissamut piukkunnarsarneqarniassammata.
