Martha Lund Olsen: Kielsenip isornartorsiuinera Siumup politikkerinngilaa
Inatsisartunut ilaasortaq Siumullu Sermersuumi qinigassanngortitaa, Martha Lund Olsen Naalakkersuisut siulittaasuata oqaaseqaataanut maanna aamma isornartorsiuilerpoq:
- Naalakkersuisut siulittaasuat isumaqatiginngilluinnarpara Nunatsinni illoqarfiit pingaarnersaata Nuup pilersaarutaanut sakkortuumik uparuaammat. Sermersuup kommunalebstyrelseani Siumut pilersaarummut ilusilersueqataallunilu maannamut pilersitseqataavoq, Martha Lund Olsen tusagassiutinut allappoq.
AAMMA ATUARUK Kielsenip Asii parteeqatinilu isornartorsiorai
Siumumiit Per Berthelsenip Kim Kielsen ataasinngornermi akissuteqarfigaa, illoqarfiillu pingaarnersaanni borgmesterip Inuit Ataqatigiinneersup, Asii Chemnitz Narupip aamma akissuteqarfigaa.
Martha Lund Olsenip erseqqissarpaa nunatsinni ineriartortoqarnissaanut illoqarfiit pingaarnersaata ineriartortinneqarnissaa pingaaruteqartoq, Kim Kielsenillu oqaaseqaatigisani nammineq akisussaaffigisariaqarai oqaatigalugu.
- Taamaattumik pilersaarummik Kim Kielsenip piviusorsiunnginneraanini nammineerluni akisussaaffigisariaqarpaa, Siumummi taama isummernikuunngimmat, Martha Lund Olsen allappoq.
Martha Lund Olsen naalakkersuisunit januaarip naanerani soraarsitaavoq. Kim Kielsenillu nassuaatigaa, kommunimut qinersinissamut sassarniarnissamik pilersaaruteqarluni naalakkersuisuusoqarsinnaanngitsoq.
AAMMA ATUARUK Kielsenip Martha Lund Olsen tusagassiortunik katersuutsitsinermi inuulluaqquaa