Kielsenip Asii parteeqatinilu isornartorsiorai
Nittartakkatigut nutaarsiassaqartitsivimmit Sermitsiaq.AG-mit apersorneqarnermi pilersaarut isumaannakkut pilersaarutaanerarpaa kommunilu nutaamik borgmesterertaartariaqarnerarlugu.
- Kommuneqarfik Sermersuumi nutaamik politikkikkut aqutsisoqalernissamik pisariaqartitsisoqaranik Siorarsiorfimmi suliniut assersuutissatsialaavoq. Nutaamik borgmestereqalertariaqarpugut suleqatigiinnermik siuarsaasumik aamma suliniutinik annertuunik nutaanik iluamik qulakkeerinnissinnaasumik, Kim Kielsen Sermitsiaq.AG-mut allappoq.
Kielsenip isornartorsiuinera parteeqataanut aamma eqquivoq, Kommuneqarfik Sermersuumimi kommunalbestyrelsimi ilaasortat 19-it akornanni arfineq-pingasut Siumut sinnerlugu ilaasortaapput, naluneqanngitsutullu pilersaarut saqqummiunneqartoq kommunalbestyrelsemit isumaqatigiissutigineqarpoq.
AAMMA ATUARUK Siumut politikkikkut nutaamik oqaaseqartartoqalertoq
Tamannalu Malene Lyngep, Inuit Ataqatigiinneersup, maluginiarpaa, taamaammallu ilanngutassiamut oqaaseqarfissami partiip siulittaasuata ilaasortaatitaminut taama saassussinera eqqarsarnartoqartillugu allappaa.
Malene Lyngellu Kommunalbestyrelsimi ilaasortaaqataa Per Berthelsen, Siumumeersoq, aamma oqaaseqarpoq:
- Aningaasassaqanngilluinnartumik mittarfiliornissamik siulliulluni aallartitsisuulluni ilisimassavaa, Berthelsen allappoq, Naalakkersuisullu naak aningaasaqarnermut naalakkersuisoqarfiup qularnartoqarnerareeraluaraa mittarfinnik sanaartornissamut kateritsitsinernik tusagassiutinullu nalunaaruteqarsimanerannik innersuussuteqarpoq.
AAMMA ATUARUK Siumumi avissaartuuttoqarpoq
Kiisalu kommuninut qinersisoqanngitsiarnerani kommunip pilersaarut taama angitigisoq aningaasaliiffigineqanngitsorlu saqqummiunnera Kielsenip eqqarsartorujussuunerarpaa.
