Kayap takornartat mattusimasut pisiniuppai: Eqqarsaatigaara nammineq qanoq issanerlunga
Corona pillugu mattusimagaanni ikiorteqartariaqarpoq. Tassa nerisassarpassuarnik allarpassuarnillu peqqumaateqanngikkaanni.
Angerlarsimaffimmi mattussaasimagaanni soorlu equutissianik, panodilinik imaluunniiit allaat nangernik pisiniussisinnaasumik ilisarisimasaqarnani taava qanoq iliortoqarsinnaava?
Taava Kaya Olsenitut ittoqarnera iluaqaaq. Sapaatip akunnera kingulleq akeqanngitsumik inuit takornartat, covid-19-imut ersiutillit taamalu angerlarsimaffimminnik qimatseqqussaanngitsut pisiniuttarpai.
- Qanoq ikiussinnaanerlunga eqqarsaatigeqaara. Ikiortissaqanngikkuma nammineq qanoq issanerlunga isumaliutigaara, Kaya Olsen oqaluttuarpoq.
AAMMA ATUARUK Tamaat isigalugu: Coronavirus pillugu killiffik
29-nik ukioqarpoq Ilisimatusarfimmilu ilinniartuulluni. Qanittukkut angajoqqaavi qatanngutaalu misissortinnerminni coronamik ersiuteqarput taamalu angerlarsimasariaqarlutik.
- Pisiniunnissaannik ikiortarpakka, taavalu eqqarsarpunga aamma allanut taamaaliorsinnaalunga. Decembarip kingornatigut, misilitsissummik tunniussereerlunga, ilinniartinneqarsimanngilagut, taamalu ulluni arlalinni nukissaqarlunga.
- Aammaliu biileqarpunga, taamalu nioqqutissanik angallassisinnaalunga, Kaya Olsen oqarpoq.
Elvira Brugsenimi Facetime-mikkut ilaavoq
Taamaattumik Kaya Olsen Facebookgruppemi Nuuk Borgerinfo-mi ilanngussivoq inuit Nuummi Brugsenimi pisiniutissalugit neqeerooruteqarluni. Soqutiginninneq uissuummissutigaa:
- Amerlasoorparparpassuit aperipput ikiorsinnanerikka, Kaya Olsen oqaluttuarpoq.
Tamaasali angumerisinnaanngilai,kisianni sapinngisamik amerlasuut ikiorpai:
- Assersuutigalu arnaq naalungiarsuutilik nanginik, servietsinik masattunik nunguutsisuuissimasoq pisiniuppara.
Arnaq taanna tassaavoq Elvira Helene Olesen. Taanna ilaqutaalu, inersimasut marluk meeqqallu marluk mattusimapput nikittaraallutillu tunillatsittarlutik. Ikiorneqarnissani pingaarteqaa.
- Qujamasoqaanga, oqarpoq.
- Pisiniummatigut iluaqaaq, unneqqarissuuvorlu. Facetime-kkut oqaluuppugut, pisiassallu koorimut ikitinnagit takutippai.
Corona pillugu ullumikkut kisitsisit: PCR-imik misissortittut 56 procentii tunillatsissimasut
Naallu Kaya Olsen akeqanngitsumik ikiuukkaluartoq Elvira Helene Olesen misigisimavoq arlaannik tunisariaqarlugu:
- Iluangaarmat 100 koruuninik tunivara aningaasarsiumanngikkaluartoq, oqarpoq.
Elvira Helene Olesen ilaqutaalu nuummiut coronamik eqqugaasut 10 Kaya Olsenip pisiniussaanut ilaapput. Taavalu anorersualerpoq suliniuteqarnerlu unitsillugu.
Kaya Olsenilli naatsorsuutigaa sapaatip akunnerata tulliani pisiniussinermi ikiuunnini nangeqqinniarlugu allallu aamma taamaaliornissaannut kaammattorlugit, soqutiginninneq annertoqimmat.