Corona pillugu ullumikkut kisitsisit: PCR-imik misissortittut 56 procentii tunillatsissimasut
Coronamik tunillatsissimasut ullup kingulliup ingerlanerani paasineqartut 247-pput. Taakku PCR-imik misissuinernit 440-nit paasineqarput.
Tassa imaappoq tunillatsissimasut affaat sinnerlugit – tassa 56 procentii – tunillatsissimapput.
Tunillatsissimasut 445-t tunillatsissimasut ippassaq paasineqarput, taamaalilluni ullumikkut saqqummiunneqartut nutaarsiassatsialaasinnaavoq. Kisianni tunillatsissimasut piviusumik qanoq amerlatiginerat misissueriaaseq nutaaq sapaatip akunnerata siuliani atuutilersinneqartoq pissutigalugu amerlanerungaatsiarnissaat ilimanarluinnarpoq.
Tunillatsissimasut kommunini ukunani paasineqarput:
- Avannaata Kommunia: 89-it
- Kommune Qeqertalik: 77-it
- Qeqqata Kommunia: 42-t
- Kommuneqarfik Sermersooq: 38-t
- Kommune Kujalleq: Ataaseq
PCR-imik misissuisarnermut periuseq nutaaq naapertorlugu angalasussat coronamillu napparsimarululersut kisimik misissorneqartarput.
Misissueriaaseq allanngortinneqarpoq, taamaalilluni ikittuinnaat, tassa covid-imik tunillatsinnermi napparsimarululersinnaasut kisimik PCR-imik misissortissinnaalerlutik:
Inuit coronamik napparsimarululersinnaasut aamma angalasussat coronapasimik atuisussat misissortissinnaapput.
Allat sinneri angerlarsimaffimminni imminnut misissorsinnaapput aamma/ imaluunniit peqqisseqqinnissartik utaqqissavaat.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
Neriniartarfiit imerniartarfiillu januaaripo ulluisa 25-ata tungaanut unnukkut quliniit ullaakkut tallimat tungaanut matoqqasassapput.
Allat sinneri angerlarsimaffimmi, atuarfimmi suliffimmiluunniit misissortinnissamut – imaluunniit misissortinngiinnarnissamik innersuunneqarput. Taakku angerlarsimmafimmut mattutissapput peqqissinissartillu utaqqillugu. Aamma imminnut peqqissisutut nalunaarutigisassapput. Tamanna ataasinngormat nalunaarutigineqarpoq.
Oqartussanit ilisimaneqanngitsorpassuussut
Taamaalilluni nunatsinni oqartussat coronamik akiuiniarnermi suliassaanni kikkunnik tamanik misissuinissaq pingaarnerpaajunnaarpoq. Peqqinnissaqarfiit misissuisarfiillu tunillatsissimasorpassuit pissutigalugu angummassinnaajunnaarlutik kikkunnut tamanut PCR-imik misissuisinnaajunnaarmata misissueriaaseq atulersinneqarpoq.
Nunatsinnilu tunillatsissimasut ataatsimut amerlassusaat taamaalilluni ilisimaneqarunnaarluni, taamaammat coronamik tunillatsissimasut napparsimmavimmut nalunaarutigineqanngitsut amerlangaatsiarsinnaapput.
Misissueriaaseq nutaat omikronip nunatsinni tuniluutilertornerata kingorna atulersinneqarpoq. Tunillatsissimasut amerlassusaat tuniluuttoqarnerata nalaani amerlassutsit tikinneqarsimanngitsut tikinneqarput. Misissuisarfinnut napparsimmavinnilu misissuivinnut siuleriiaattut amerlasoorujussuupput. Isumalluutillu napparsimmavinni pitsaanerusumik atorneqarsinnaasut, Naalakkersuisut nakorsaanerullu, Henrik L. Hansenip nalilerpaat.
Amerlanerpaaffissaminiingajalersut
Misissueriaaseq nutaaq tusagassiortunik katersortitsinermi saqqummiunneqarmat peqqissutsimut naalakkersuisuugallartoq, Mimi Karlsen (IA) ima oqarpoq:
- Naalakkersuisullu nassuerutigaat suut tamarmik allanngortut uagullu allaannerusumik suliniuteqartariaqartugut.
- Isumalluutit pingaaruteqartut pinngitsoorneqarsinnaanngitsullu pitsaanerusumik atussavagut. Taamaaliussaagut suliaqarnerit inuttaasut peqqissusiannut pingaaruteqartut suli ingerlaannarnissaat qulakkiissagatsigu.
Nakorsaanerup, Henrik L. Hansenip oqarnera naapertorlugu tunillatsissimasut sapaatit akunnialui qaangiuppata amerlanerpaaffissamiilissapput.
