- Soorunami tupaallannaqaaq aamma taamatut naatsorsuuteqarsimanngikkaluarpunga. Kisianni taamatut tuniniarneqarnera tuppallerpunga aamma attortippunga, Katti Frederiksen KNR-imut oqarpoq.Assi: KNR / Malik Brøns

Katti Frederiksen islandimit nersornaaserneqartoq

Katti Frederiksen Islandimit islandimiut aningasaanik 6 millioninik aningaasartaqartumik nersornaaserneqarpoq.

Narsarmiu, Katti Frederiksen maanna ilinniartitaanermut, kulturimut ilageeqarnermullu naalakkersuisuusoq ullumi nersornaaserneqarpoq.

Nersornaaserneqarnerali naalakkersuisutut atuunneranik pissuteqanngilaq, tamannali ilisimatusarnerup silarsuaani suliaqarneranik pissuteqarluni.

Nersornaasiineq Islandimeersuuvoq. Nersornaasiinerlu taanna Islandimi præsidentiusumut Vigdís Finnbogadóttirimut atsiussaalluni.

Vigdís Finnbogadóttir – Institute of Foreign Languages, tassa Islandimi allamiut oqaasiinut institutti nittartakkamini taama allappoq.

Vigdísimit nutaanik pioqqaarsimasunillu kulturikkut pingaartumik oqaatsinik malinnaasimasumut ukiut tamaasa nersornaasiisoqartartoq, intitutti allappoq.

Katti Frederiksenip kalaallit oqaasiinik suliaqarnini arajutsisassaanngitsoq nersornaaserneqassutigaa.

- Taalliatigut, ilisimatusarnikkut, meeqqanut atuakkiornikkut tamallu oqallinneranni peqataanermigut kalaallit oqaasiisa kalaallinut inuiaqatigiinnut qanoq pingaaruteqartigineri qasusuilluni erseqqissarpaa.

Katti Frederiksen Kalaallit Nunaata Oqaatsinut Siunnersuisoqatigiivini ukiorpassuarni ilaasortaavoq, Oqaasileriffimmilu aamma sulisimalluni. Taannalu 2008-mit 2020-mut Siumut tunuliaqutaralugu ilinniartitaanermut, kulturimut ilageeqarnermullu naalakkerusisutut toqqarneqarnissami tungaanut suliffigalugu.

Nersornaaseqarnerma kajuminnerulersippaanga

Katti Frederiksenip nersornaaserneqarnini tupaallaatigisani nuannaarutigaa.

- Soorunami tupaallannaqaaq aamma taamatut naatsorsuuteqarsimanngikkaluarpunga. Kisianni taamatut tuniniarneqarnera tuppallerpunga aamma attortippunga, Katti Frederiksen KNR-imut oqarpoq.

- Qujamasuppunga maannamut suliniutigisartakkakka malugineqarsimammata aamma nunatta avataaniit. Nukissanik tunisivoq aamma kajuminnera soorlu sakkortusarneqaannartoq ikummarissarneqartutullusooq iinnartoq.

Taassuma qujassuteqarluni oqalugiaataa naapertorlugu oqaatsinut, atuakkianullu atassuteqartumik qassiiusunik suliniuteqarpoq, nersornaaserneqarneralu suliniutinut taakkununnga sunniuteqangaatsiassanerarpai.

AAMMA ATUARUK Katti Frederiksen kultureqarnermut ilinniartitaanermullu naalakkersuisunngortoq

- Atuakkanik saqqummersitsisarfiuteqarpunga, taassuma iluani inerisaaqqinnissannut suliniutinik ingerlataqarpunga, kisianni aamma assigiinngitsunik maannakkut pilersaarusiorlunga aallartitaqarnikuuvunga. Kisianni taakku itisilerlugit oqaatigissanngilakka, piffissami qanittumi taakku saqqummiukkumaarpakka.

Katti Frederiksen ilinniartitaanermut, kulturimut ilageeqarnermullu nutaanik naalakkersuisoqalernissaata tungaanut naalakkersuisuuvoq.

Katti Frederiksen qineqqusaarnissamut sassarsimanngilaq, politikkikkullu suliaqarnini unitsikkallarniarlugu aalajangersimavaa.

- Tassa qineqqusaanngilanga, taamaattumik massakkuugallartoq politikkimi pulasimanera taamaateriarlugu oqaatsinik atuakkialerinermik kulturitsinnullu inerisaaqqinnissamik nukikka atussavakka.

- Politikkimut uternissaq mattutinngilara, kisianni siunissap taanna takutikkumaarpaa.

Katti Frederiksen nersornaaserneqarnermi saniatigut islandimiut koruuninik 6 millionit koruuninik tassa danskit koruuninngorlugu 293.760 koruuninik aningaasannappoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat