Vivian Motzfeldt illersornissamik isumaqatigiinniarneq pillugu: Kangerlussuaq ukkatarineqarpoq

Kangerlussuaq illersornissamik isumaqatigiissutitaassami immikkut ukkatarineqassaaq.

Nunatsinni Savalimmiunilu nakkutilliineq sillimaniarnerlu isumaqatigiissutissami immikkut ukkatarineqarput. Kangerlussuaq isumaqatigiinniarnerni aamma ukktatarineqartariaqartoq, naalakkersuisut isumaqarput.

Upalungaarsimanermik Kangerlussuarmi ilinniarfik 22-nik ilinniartoqaleqqammerpoq. Tassanili  ilinniartunngorusuttorpassuaqarpoq, taamaammat ilinniarfiup taassuma 30-inik 2025-imi ilinniartoqarsinnaalernissaa Danmarkip illersornissamut ministeriata Troels Lund Poulsenip (V) neriorsuutigaa.

- Upalugaarsimanermut ilinniarfimmi aallartisartut takussutissaqalereerput aammalu tunngavissaqalissallutik, nunatta nammineq piginnaasanik annertunerusunik ineriartortitsinissaanut, nunanut allanut tunngasuni naalakkersuisoq Vivian Motzfeldt (S) KNR-imut oqarpoq.

Ilinniarfimmi tassani sammivissatut toqqagassat amerlanerusariaqartut, taanna isumaqarpoq. Assersuutigalugu Siriusimi Kangerlussuarmi alapernaarsuisunngorniartoqartalernissaa siunnersuutaanut ilaavoq.

- Soorunami, nunarpununa pineqartoq. Taamaammat nunatsinni nakkutilliinermi piginnaasallit ineriartortinneqarsinnaaneri nunatta aamma piginnaasarisariaqarpai inertortillugillu, Vivian Motzfeldt oqarpoq.

Nunatta Nunanut Allanut, Sillimaniarnermut Illersornissamullu 2024-miit 2033-mut Politikkissaanut Periusissiaq, naalakkersuisut ukioq manna saqqummiuppaat, nunattalu nunatsinni immamilu upalungaarsimanermi sillimaniarnermilu akisussaaqataanerulernissaa tassani anguniakkanut ilaavoq.

Tassa Upalungaarsimanermik Kangerlussuarmi Ilinniarfik Islandimisulli sakkutuujunngitsunik nunatsinni upalungaarsimasoqarnerulernissatsinnut sineriammilu nakkutilliisoqarnerulernissatsinnut tunngaviliisooqataassaaq.

Kangerlussuaq dronenik nakkutilliisoqarfinngussasoq

Kangerlussuup inui siunissamut nalorninartorsiuleruttorput. Nuummimi Ilulissanilu mittarfissuassat ammarpata, Kangerlussuup mittarfia nunarsuup sinneranut silaannakkut angallaffittut novembarimi qitiujunnaassaaq. Kangerlussuummi mittarfia sakkutuujunngitsunik timmisartuussinermik upalaarfiujunnaarpat sakkutuujunngitsunik tamaani suliffissaqartitsinermut qitiujunnaartussaassaaq.

Nunatsinni silaannakkut angallaffittut qitiuinnassaaq, aamma Illersornissaqarfik tamaani suliaqaannassaaq. Nunatsinnili silaannakkut angallaffittut qanoq qitiuinnartigitigissanersoq Illersornissaqarfillu tamaani qanoq suliaqaannartigitigissanersoq ilisimaneqanngilaq.

Dronenilli, tassa timmisartuaqqanik ungasianiit aquttakkanik marlunnik nunatta sineriaani aamma nakkutilliissuteqalissasoq, isumaqatigiissutaavoq. Kangerlussuarmilu taakkuninnga nakkutilliisoqarfeqalerneq suliffissaqartitsisussaassasoq, Vivian Motzfeldt oqarpoq.

- Dronit taakkua pineqartut angisoorujussuupput, pingaarnertut angerlarsimaffeqassallutik Danmarkimi, kisianni uangut nunatsinniit kissaatigaarput, kangerlussuami servicerneqarlutillu milluni aamma suliffissanik pilersitsissasoq. Aammalu piginnaasanik ineriartortitsiffiussasoq, taanna oqarpoq.

Illersornissqarfiulli Kangerlussuarmiiginnarnissaa qanoq amerlatigisunut suliffissaqartitsissutaassanersoq, Vivian Motzfeldtip ilisimatitsissutiginngilaa.  

Issittumi Sakkutooqarfik Kangerlussuarmi suliaqarnerulissasoq, Danmarkip naalakkersuisui Naalakkersuisullu nalunaaqqammerput. Qanorli suliaqarnerulertigissanersoq oqaatiginngilaat.

Issittumi Sakkutooqarfiulli qitiusumik allaffeqarfia Nuummiikkunnaarluni Kangerlussuarmiilissasoq silaannakkullu Nuummi nakkutilliisoqarfeqalissasoq, Siumup siunnersuutigaa. Island Canadalu silaannakkut nakkutilliinermik 2031-mi akisussaasuujunnaarpata nunarput akisussaasunngussaaq. 

- Massakkut nunatsinni tiguniarlugu sulissutigineqarmat, inuppassuit aamma pisariaqartinneqartussaammata tassani. Assersuutigiinnarlugu immaqa Nuummi taakkua inissaqarluarnissaat qulakkiissagutsigu, taava immaqa Arktisk Kommando aamma Kangerlussuarmut ilaa nuunneqarsinnaasutut isigivarput, Inatsisartut Nunanut Allanut Sillimaniarnermullu Ataatsimiititaliaanni ilaasortaq Kuno Fencker KNR-imut oqarpoq.

Nutaanik umiarsuaqalernissaa immallu naqqatigut kabelitaarnissaq nalorninartumiittoq

Kalaallit Nunaallu imartatigut nukittunerussaaq. Illersornissaq pillugu umiarsuit qassit, umiarsuit akii aggiunneranullu sivisussuseq politikerit illersornissaq pillugu isumaqatiginninniarnermik suliallit upernaaru oqallisigissavaat.

Umiarsuit sorliit, amerlassusissaat pisinnaasaallu pisariaqartinneqassasut Vivian Motzfeldtip oqaatigereerusunngilaa.

Folketingimut ilaasortat Nunatsinneersut Savalimmiormiuneersullu Christiansborgimi isumaqatiginninniarnermut qaaqqusaapput. Isumaqatiginninniarnermilu Nunatsinni qarasaasiatigut sillimaniarnerup pingaaruteqassusaa folketingimut ilaasortap IA-meersup Aaja Chemnitzip isumaqatiginninniarnermi erseqqissarpaa.

Nunatta attaveqaatit akisussaaffigaat, naalagaaffiulli sillimaniarneq aamma atortulersuutinik taaneqartartoq akisussaaffigalugu. Taamaattumik illersornissamut isumaqatiginninniarnermi immap naqqatigut kabelip isumannaarsarnera ilaasariaqartoq, Aaja Chemnitz oqarpoq.

- Immap naqqatigut kabeli ullumik atorunnaarfissaqarpoq, taamaattumillu immap naqqatigut kabelimik sillimmateqarnissap qulakkeernissaa pingaaruteqarluinnarpoq. Taamaalilluta sillimaninngorsinnaavugut, immammi naqqatigut kabeli kipineqapallariaannaavoq, taanna oqarpoq.

Immap naqqatigut kabelit isumaqatiginninniarnermi ilaasut Vivian Motzfeldtip oqaatigaa. Immalli naqqatigut kabelissat nutaat Nunatsinni atorneqartussat Danmarkip akilissanerai toqqaannaq oqaatiginngilaa. 

Taannalu aallaavigalugu Atlantikup avannarpasissuani nakkutiginninneq illersornissarlu isumaqatiginninniarnerup pingajussaani sammineqassaaq. Aasaanerani feeriarfeqarnerup kingorna tamanna pissaaq.