Kandidatinngorniummik allaaserinnittoq: 4 milliardit allaaserisanni eqqaaneqanngillat

Transfer pricing atorlugu qaleralinnik avammut tunisisarnermi nunarput ukiumut 4 milliardinik annaasaqartartoq kandidatinngorniummi taaneqarnerarlugu Aki Matilda Høegh-Dam innersuussivoq, taassuminngali allaaserinnittoq ilumuunnginneraavoq.

Allattoq Liv Almer

juulip 05-at 2023 07:24

Nutserisoq Nathan Kreutzmann

Danmarkip qaleralinnik avammut tuniseqqinnermini transfer pricingimik (piginneqatigiiffiup nunat killeqarfii akimorlugit suliffeqarfiutaasa niueqatigiinnerminni akinik aalajangiisarnerat) atuisarnera ilumut nunatta 4 milliard koruuninik annaasaqaatigisarpaa?

Aki-Matilda Høegh-Damilli (S) kandidatinngorniummi allaaserisami kisitsisit taaneqarneraraluarai allaaserinnittup ilumuunnginnerarpaa.

Folketingimut ilaasortaq aamma Siumup siulittaasussaatut qinigassaq Aki-Matilda Høegh-Dam danskit tusagassiiviinut arlalinnut maajimi oqarpoq Danmark transfer pricing atorlugu qaleralinnik avammut tuniseqqikkaangat nunatta ukiumut 4 milliardinik annaasaqaatigisaraa.

Taama oqarneq aalisarnermut aningaasarsiornermullu ilisimasallit, atorfilittat aamma immikkut ilisimasallit eqqumiigalugu apeqqusiillutik KNR-imut sisamanngormat oqarput.

TRANSFER PRICING SUUA?

Piginneqatigiiffiit, aktiaatillit, inuilluunniit nunani niuffaffigisaminni akigititaasut naapertorlugit niueqatigiittussaatitaapput.
Tassa imaappoq niuernermi nalinginnaasumik atugassarititaasut malinneqartassapput, taamaalilluni akit atugassarititaasullu illua-tungeriinnut imminnut attuumassuteqanngitsunut marlunnut naapertuuttumik isumaqatigiissutigineqartarnissaat qulakkeerneqassalluni.
Taama akinik aalajangiineq taaneqartarpoq transfer pricing.
Piginneqatigiiffup niuernermi atugassarititaasut malinnagit niuernera ilaatigut akileraarnikinnerunissamik anguniagaqarnermik isumaqarsinnaavoq.

Tigusiffik: Skat

Allisiguk

Aki-Matilda Høegh-Dam KNR-imut mailerluni allappoq kisitsisit taasani 2016-mi kandidatinngorniummeersuusut, paasissutissallu 2014-meersut allaaserisami pineqartut.

Tamannali ilumuunngilluinnartoq kandidatinngorniummik allaaserinnittoq Ilannguaq K. Møller KNR-imut oqarpoq.

4 milliardit suminngaanneerpat?

- Naalagaaffiup tapiissutaasa 99 procentii Danmarkimut ukiut tamaasa uteqqittartut misissuinermi takutinneqarpoq. Danmark aqqutigalugu transfer pricingimik atuisarnermik unammillernartoqartitsivugut.

- Qalerallit kisiisa qiviaraanni Danmarkip nunamut allamut transfer pricing, tunngavigalugu tunisai nunatta 4 milliardit koruunit missaannik annaasaqaatigisarpai, Aki-Matilda Høegh-Dam DR-imut maajimi oqarpoq.

Taama oqarneq immikkut ilisimasallit aalisarnermik aningaasarsiornermillu ilisimasallit arlallit isornartorsiorlugu KNR-imut oqarput.

- Tamanna ataasiinnavimmik aallaaveqarpoq; pissutsit qanorpiaq innerannik ilisimasakissuseq aammali peqquserluttuliortoqartuaannarneranik eqqarsarneq, Polar Seafoodip pisortaanera Henrik Leth ilaatigut taama oqarpoq.

KISITSISIT QALERALIMMUT TUNNGASUT

Qalerallit 1,5 milliard koruunit missaanik nalillit nunatta 2022-mi avammut tunisimagai Nunatta Naatsorsueqqissaartarfiani takuneqarsinnaavoq.
Danmark qaleralinnik 2,2 milliard koruunit nalinginut 2022-mi avammut tunisaqartoq danskit inuussutissanut, nunalerinermut aalisarnermullu ministereqarfik Aki-Matilda Høegh-Damimut (S) akissuteqarluni allappoq.
Aalisarnermit aningaasat iluanaarutaasartut suli amerlanerujussuusinnaasut nunattalu namminiilivinnissaanut iluaqutaalluarsinnaasut politikerit arlallit Inatsisartunut 2018-mi qinersinermi uparuarpaat.

Aki-Matilda Høegh Dam apersorneqarnissaminut periarfissaqanngilaq, KNR-imulli mailerluni allappoq kandidatinngorniummut 2016-meersumut kisitsisinik 2014-meersunik imalimmut innersuussilluni.

Ataatsimilli ajornartorsiuteqarpoq.

4 milliardimmi taakkartorneqartut kandidatinngorniummi 2016-meersuni aamma nassaassaanngillat.

- Qaleralinnik tunisinermi transfer pricingip atorneqartarnerata nunatsinnut 4 milliardinik annaasaqaataasarnera soraarummeerutinni allaqqanngilaq, kandidatinngorniummik allaaserinnittoq Ilannguaq K. Møller mailerluni KNR-imut allappoq.

Kisitsisit ukiunik qulingiluanik pisoqaassusillit allaanerupput

Transfer pricingili pissutigalugu nunarput milliardilikkaanik annaasaqartartoq Aki-Matilda Høegh-Damip kandidatinngorniummi innersuussutigisaani inerniliunneqarpoq.

Qaleralinnilli avammut tunisinermut tunngasut 4 milliardit Aki-Matilda Høgh-Damip taasaanit annikinnerupput.

Transfer pricing pissutigalugu nunarput 1,3-t aamma 3,4 milliard koruuninik annaasaqartartoq kandidatinngorniummik allaaserinnittoq Ilannguaq K. Møller teoriiliornermini paasisaqarsimanerarpoq. Qaleraliinnaalli pineqaratik aalisakkat qaleruallillu tamarmik avammut tunineqartartut pineqarput.

KNR-ip Aki-Matilda Høegh-Dam apersorpaa, Ilannguaq K. Møllerillu allaaserisamini qaleralinnik tunisisoqartillugu transfer pricingip atorneqarnerani nunatta 4 milliardinik annaasaqartarneranik allaqqasoqannginneraalluni oqarnera saqqummiullugu.

Aki-Matilda Høegh-Damilli suliaq allatut isumaqarfigaa.

- Pissutsit piviusut isigissagutsigit transfer pricingip atorneqartarneragut nunatta aningaasat annaasagai annertunerusulluunniit ilimagineqarsinnaavoq, taanna oqarpoq.

Aamma atuarukImmikkut ilisimasallit tupigusuttut: Suut 4 milliardit?

Qaleralinnik tuniseqqinnermi aningaasat nunatta ukiut tamaasa annaasagai naalagaaffiup tapiissutigisartagaasut amerlatigisinnaasut Aki-Matilda Høegh-Dam tusagassiuutinut allanut oqaaseqareerpoq, isummanilu attallugu KNR-imut oqarpoq.

- Misissuineq takugukku ilaatigut erseqqissumik oqaatigineqarpoq naalagaaffiup tapiissutigisartagaasa annertoqataanik annissuisoqartartoq. Soorunami tapiissutaasartoq ullutsinni allatut isikkoqaraluartoq naalagaaffimmut tapiissutit aallaavigaakka, taanna oqarpoq nangillunilu:

- Taamaammanuna oqartunga ilimagivaraluunniit kisitsit ullutsinni annertunerusoq.

Kandidatinngorniutigalugu allaaserisami kisitsisit aallaavigineqartut sukumiisuunngillat, aalisarnermimmi ingerlatseqatigiiffiit kisitsisaataat tamanit takuneqarsinnaanngillat.

Ilannguaq K. Møllerili kisitsisit arlallit pissarsiarineqarsinnaasut aallaavigalugit teoriiliorsimavoq, kisitsisillu Islandimeersut nunatsinneersullu kingorna sanilliussimallugit.

Taamaaliornermigullu kisitsinermigut milliardit pineqartut inerniliussimavai. Kisitsisilli qularnaaqqissaarneqanngitsut taanna KNR-imut nassuiaavoq.

- Allaaserisara ”soraarummeeruutaannaammat” Islandip nunattalu avammut tunisinerani kisitsisit sanilliussinissannut piffissaqarnangalu periarfissaqarnikuunngilanga, taanna mailerluni akissuteqarpoq.

Nutaarsiassami kukkunermik nassaarsimaguit uunga allaffigineqarsinnaavugut.