Immikkut ilisimasalik: Aalisarnermi sinneqartoorutit unioqqutitsinertaqanngitsumik nuunneqartarput
Nunarput aalisarnikkut uukapaatinneqarpa? Aalsarnermit aningaasarpasuit suli pissarsiarijneqarsinaasut, aningaasallu annaasat nunatta namminersulernissaata aningaasalersornissaanut ilapittuutaasinnaaqisut politikerit arlallit qimeqqusaaarnermi oqarput.
Nunatsinni aalisarneq pillugu immikkut ilisimasalik isumaqarpoq politikerit taamatut isumaqarnerat eqqortortaqarsinnaasoq, milliarderpassuunngillalli ataatsimoortumik tapiissutinut taartissatut atorneqarsinnaasut.
- Taamaattoqarsinnaanera periarfissaavoq, Danmarkimi ingerlatseqatigiiffinnut akileraarut Kalaallit Nunaanni akileraarutaasumit appasinnerummat, Københavnip Universitetiani Inuussutissat Pisuussutillu pillugit aningaasaqarnermut Instituttimi lektori, Max Nielsen, taama oqarpoq.
AAMMA ATUARUK Ukioq 2017 aalisarfiulluarsimanngilaq
Taanna aalisarnikkut aningaasarsiornermik suliaqartuuvoq, aalisakkanillu tunisassianut nunatsinneersunut nalitusaaviit pillugit nalunaarusiamik annertuumik 2017-imi suliaqarsimalluni.
Max Nielsen naapertorlugu aalisarnermik ingerlatseqatigiiffiit sinneqartoorutitik Danmarkimi akileraarutaasussanngorlugit iluaqutissartalimmik nuussinnaavaat, ingerlatseqatigiiffinnut akileraarut Danmarkimi appasinnerummat.
Sinneqartoorutit inatsisit malillugit nuunneqartarput
Max Nielsenip naliliinera naapertorlugu aalisarnermik ingerlatseqatigiiffiit nunat killeqarfiit akimorlugit tunngaviatigut imminnut niuertarnerat inatsisitigut unioqqutitsinertaqanngilaq. Tamannali naggataagut inatsisilerituunit nalilersuiffigineqartariaqartoq:
- Kalaallit Nunaata Danmarkillu akornanni takussaavoq, aammali nunat tamat niueqatigiittut akornanni ingerlatseqatigiiffiillu nunarsuaq tamakkerlugu ingerlataqartut nunani marlunni ingerlatseqatigiiffinnik pigisallit akornanni takussaavoq, Max Nielsen oqarpoq.
Kalaallisut nal. 19.30, danskisullu nal. 21.
Max Nielsenip taamatut naliliinermini Ilisimatusarfimmi immikkut allaaserisamik naliliineq tunngavigaa, tassani Nunatsinnit avammut nioqqutigineqartunut akinik Islandimit Savalimmiuniillu avammut nioqqutigineqartunut akinut nallersuussisoqarmat.
Sinneqartoorutit nunatsinnit annissorneqarsorineqartut annersaat, nunatsinnilu akileraarusersorneqarsinnaagaluartut, ilisimatusartup erseqqissumik kisitsisitalerusunngilai. Annerpaamilli "hunnorujut millionit koruunit arlaqanngitsuunissaannik" taggippai:
Milliardinik oqalunneq ingappallaarpoq
- Tassa, milliardinik oqalunneq ingasappallaarpoq. Hunnorujut millionit koruuninik arlaqanngitsunik taasaqarnera qaninnerpaavoq, aamma oqaatigisariaqarpara tamanna sukumiisumik misissoqqaarneqartariaqartoq, Max Nielsen taama oqarpoq.
AAMMA ATUARUK Aningaasanut inatsit akitsuutinit nutaanit 85 millionit koruuninut missingersuuteqartoq
Politikerit aningaasat nunatta karsianut isertinniarunikkit ajornartorsiut sukumiinerusumik misissortariaqarpaat imaluunniit akitsuutit qaffaaviginerisigut aalisarnermi sinneqartoorutit iluanaaruteqarfiginerullugit:
- Aalisarnermut akitsuutit raajanullu akitsuutit qaffaaviginissaat ajornanngitsuararsuuvoq, taakkumi qaffaavigigaanni suliffeqarfiit akileraarutinut, soorlu assersuutigalugu aalisakkanut akitsuutinut, aningaasartuuteqarnerulerunik sinneqartoorutimik ilaannik nunamiiginnartitsinissaannut pinngitsaalineqassammata, Københavnip Universitetiani Inuussutissat Pisussuullutillu pillugit aningaasaqarnermut Instituttimi lektori, Max Nielsen, taama oqarpoq.
Siulittaasup taamaattoqannginnerarpaa
Henrik Leth nunatsinni aalisarnermik ingerlatseqatigiiffiit namminersortunit pigineqartut anginersaanni, Polar Seafoodimi, siulersuisuni siulittaasuuvoq, ingerlatseqatigiiffillu sinneqartoorutiminik nunatta avataanut nuussineq-ajortoq oqaatigaa:
- Naagga, aningaasanik nunap avataanut nussuinngilagut. Nammineq nioqqutissiatta ilaannik Danmarkimi ingerlatseqatigiiffinnut nammineq pigisatsinnut tunisaqartarpagut, tassanilu iluanaarutaasinnaasoq annikitsuaraavoq, Henrik Leth oqarpoq.
Polar Seafoodip nioqqutissat Danmarkimi suliarineqarnerinut aningaasartuuteqartarnera erseqqissaatigaa:
- Nioqqutit illumi qerititsivimmiitinneqartussaapput, RAL aqqutigalugu assartorneqartussaapput, tamakku aamma akeqarput. Taava aamma qerititsiveqarfimmit pisisussamut assartorneqartussaapput, tamakku tamarmik aamma aningaasanik naleqarput. Taamaammat imaanngilaq arlaanni annertuupilussuarmik iluanaarutissaqartoq. Matumani naleqarnerulersitsineq aningaasartuutitaqarpoq, Henrik Leth taama oqarpoq.