Aningaasanut inatsit akitsuutinit nutaanit 85 millionit koruuninut missingersuuteqartoq
Inatsisartut ukiakkut ataatsimiinnerat ataasinngorpat naggaserneqassaaq, politikerilli upernaami ataatsimiinnissami tungaanut eqqissillutik sulilernissaannut suli immikkoortunik annertuunik naammassinneqqaagassaqarput. Matumani ilaatigut Naalakkersuisut aalisarnermut akitsuutinut nutaanut siunnersuutaat pingajussaassavaat matumalu kingorna aningaasanut inatsit akuerissallugu.
Naalakkersuisut 85 millionit koruuninik nutaanik raajanit qaleralinnillu akitsuutinit isertitaqarnissamut missingersuusiortut, aningaasanut inatsimmut allannguutini kingullerni atuarneqarsinnaavoq. Aalisarnermit isertitaqarnerunissami naatsorsuuteqarnermi raajartassiissutit amerlassusaat katillugit 2018-imi qaffattussaanerat peqqutaaqataavoq.
AAMMA ATUARUK Qaleralinnut raajanullu akitsuutit qaffalersut
Aalisarnermit isertitassat qaffannerata aningaasanut inatsip missingersuutaani 11,2 millionit koruuninik sinneqartooruteqarnissamik qulakkeereqataavoq.
Oqaatsit allat atorlugit oqaatigalugu politikerit inatsip aappaani minuserujussuarnianngikkunik tamanna angissavaat.
Siunertanulli nutaanut aamma aningaasassaqalerpoq. Tamanna ilaatigut kultureqarnermut susassaqarfiup pitsaanerulersinniarneranut ilaatigut tunngavoq tassani 6,5 millionit koruunit ilanngunneqarput.
Perorsaasunngorniarnerup isumaginninnermullu siunnersortinngorniat lloqarfigisaq qimannagu ilinniarsinnaanerata pitsanngorsarneranut aamma aningaasanik nassaartoqarpoq, tassunga 16 millionit koruunit ilanngunneqarput.
Uummannami nutaamik umiarsualiornissamut Qaanaamilu innuttaasunut nutaamik talittarfiliornissamut aamma aningaasassarsisoqarpoq.
