Qaleralinnut raajanullu akitsuutit qaffalersut
Naalakkersuisut siunnersuutigaat aalisarnermi akitsuutit katillutik koruuninit 312 millioniniit koruuninut 365 millioninngornissaat. Akileraarusersueriaatsip nutaap suliarineranut atatillugu aningaasaqarnermut- akileraartarnermullu ataatsimiititaliap paaserusussimavaa kikkut annerusumik akitsuutinut akiliisassanersut.
Ataatsimiititaliamut Naalakkersuisut naatsorsugaanni takuneqarsinnaavoq raajanik qaleralinnillu avammut nioqquteqarnermit aningaasarpassuit aaneqassasut.
Raajanik tunisinermit koruunit 15 millionit pissarsissutaassapput.
Qaleralinnillu tunisinermit koruunit 33 millionit annerusumik pissarsissutaassallutik.
Taakku saniatigut raajanik nunamut tunisinermi aalisartut akitsuusiinikkut akileraaruserneqassapput. Taamaalillutik sinerissap qanittuani raajarniat koruuninik 17 millioninik isertitsissutaassallutik, akerlianik sinerissap qanittuani qaleralinniat annikinnerusumik akitsuuserneqassasut.
Naatsorsuinerit naapertorlugit taasagut kingulliit koruuninik 7 millioninik akitsuutinut akiliinikinnerussallutik.
AAMMA ATUARUK Snak om brandbeskatning er ikke på sin plads
Kalaallit Nunaanni Sulisitsisut peqatigiiffiata aamma aalisartut piniartullu kattuffiata KNAPK'p akileraarusersueriaasissat nutaat pillugit assorsuaq isornartorsiuisimapput.
Aalisarnermik suliaqartut isumaqarput akileraarutit nutaat aalisarnermut inatsisissap siunertaanut akerliusut, tassanimi siunertaammat aalisarnermik suliaqartut siammarnerunissaat, naatsorsuutimmi nutaat takutimmassuk aalisarneq sunniutikinnerulerumaartoq.
Aningaasaqarnermut- akileraartarnermullu ataatsimiititaliami amerlanerussuteqartut Siumut Inuit Ataqatigiillu nutaamik akileraarusersueriaasissamik siunnersuut pingajussaanneerneqarnerani akuerineqarnissaa innersuussutigaat.
Akileraarutissanut Demokratit akerliupput isumaqaramik aaqqissuussineq nutaaq aalisartut aningaasaleeqqinnissaannut nutarternissaannullu akissaqarnissaat eqqarsaatigineqarsimanngitsut, nunarsuarmilu niuverfinni unammillersinnaanerannik isumamannaarinninngitsoq.
Nittartakkatsinni KNR.gl-imi takusinnaavatit akileraarutit nutaat qanoq agguataarneqarsimanersut.
AAMMA ATUARUK Aalisarnermi akitsuutit nutaat isornartorsiorujussuarneqartut
