Kalaallit qimmii pillugit nutaamik inatsiseqalersinnaassasoq

Oqartussat kalaallit qimmii illersorsinnaanerujumallugit maanna inatsisit nutarterneqartariaqarput.

Naalakkersuisut Inatsisartut kultureqarnermut, ilinniartitaanermut, ilisimatusarnermut ilageeqarnermullu ataatsimiititaliamut taama allapput.

Ataatsimiititaliamit isumaliutissiissummi tamanna atuarneqarsinnaavoq.

- Qimmit pillugit inatsisissatut siunnersuummi nutaami sakkortunerusumik pineqaatissiisinnaanissaq periarfissiissutigineqarpoq, akisussaaffeqartarnermut tunngasut ersarissarneqarput aammalu pasinartoqartillugu iliuuseqartarsinnaanissat periarfissiissutigineqarlutik, Naalakkersuisut allapput.

AAMMA ATUARUK Illersuisoq aamma Inatsisartunut ilaasortaq akuliuppoq: - Suliaq una ilinniarfigisariaqarparput

Nunatta qimmiisa illersorneqarnissaat oqallisaasorujussuusareerput. Qimmit qimuttut qimminit allanertanit akusaasimanissaannik siorna pasinnittoqarmat, minnerunngitsumik oqallisigineqarpoq.

Maannalu inatsisit taama pasinninnerit aallaavigalit iliuuseqarsinnaatitsinngitsut, Naalakkersuisut allapput.

- Qimminut tunngatillugu inatsit atuuttoq 1998-imeersuuvoq taannalu naapertorlugu akiliisitsinerit kisimik aqqutigalugit pineqaatissiisoqarsinnaavoq. Suliassaqarfimmut tassunga tunngatillugu akisussaaffiit pineqaatissiisarnerillu erseqqissaatigisarnissaat ajoraluartumik pisariaqartarsimavoq, Naalakkersuisut allapput.

Tamatuma saniatigut qimmeqarfiit qimmeqarfiunngitsullu assiaquserneqanngimmata, qimmit qimuttut qimminik allanik akuneqarusuppata, tamatuma pinngitsoortinnissaa ajornakusoortorujussuusoq, Naalakkersuisut allapput.

AAMMA ATUARUK To hunde aflivet i Qeqertarsuaq

Tamannalu inatsisit nutaat allanngortissavaat.

Inatsisiliorneriinnarli kalaallit qimmiinik illersuinissamut naammanngitsut, Naalakkersuisut allapput.

Kalaallit qimmii piniarneq aalisarnerlu eqqarsaatigalugit kulturitsinnut ilaalluinnartut. Kulturi taanna attanneqartariaqartoq, innuttaasunullu qanilaartunngortinneqartariaqarluni.

Ilisimasatoqqallu ilisimatusarnerlu taamaattoqarnissaanut aqqutissiuissasut, Naalakkersuisut isumaqarput.

AAMMA ATUARUK KNQK: Qeqertarsuarmi qimmit qimuttut marluk allanertanik akusaasimapput

Ataatsimiititaliamut akissumminni ima allapput.

- Ilulissat kangerluani takornarianut sullissivissami qimminut immikkoortortamik pilersitsinissaq takorluugaavoq.

- Tassani ilinniartitsisarneq, ilisimasanik paarlaasseqatigiittarnerit ilisimatusarnerlu sammineqartassapput, paasissutissallu tassanngaanneersut atuarfiit aqqutigalugit meeqqanut atuartunut, katersugaasivinni aaqqissuussinissanut ilinniarfinnullu allanut siammarterneqartassapput, tassani siunertarineqarluni naleqalersitsinissaq aammalu kalaallit qimmiata qimuttup piujuaannarnissaa, Naalakkersuisut allapput.

Ataatsimiititaliamut ilaasortat Naalakkersuisunit akissut iluarisimaarpaat.