Kalaallit qimmiat nunarsuarmi rekortiliisut allattorsimaffianiilissasoq

Kalaallit qimmiat qimmini qimuttuni nunarsuarmi pisoqaanerpaatut toqqarneqarluni 2026-mi rekortiliisut allattorsimaffianiilissaaq.

Allattoq Paarnannguaq Nielsen, Paalu Møller

januaarip 15-at 2025 11:53

Nunarsuarmi qimmini qimuttuni kalaallit qimmiat utoqqaanerpaatut toqqarneqarluni atuakkami Guinness World Recordsimi tassa nunarsuaq tamakkerlugu rekortiliisimasut allattorsimaffianni aappaagu saqqummertussamiissaaq.

Qimmeq Projekt-imik taallugu kalaallit qimmii pillugit ilisimatusartut, ilinniartut, uumasut nakorsaat, qimussertartut ilinniartitsisut kiisalu assiliisartut suleqatigiillutik paasisassarsiorsimapput.

Paasisallu aallaavigalugit uumassusilerituup Mikkel Sindingip aviisimi Science-mi ilannguttumik allaaserisaqarpoq. Tassanngaaniillu Guinness World Recordsimiit saaffiginnittoqarpoq.

- Uumassusilerituup Mikkel Sindingip allaaserisaa Sciencekkut saqqummermat Guinness rekordbogimiit Qimmeq Projekt saaffigineqarpoq taamaalilluni nunarsuaq tamakkerlugu rekortiliisimasut allattorsimaffianni ilaasussanngorluni, P.h.D-nngorniuteqartoq Qimmeq Projektimilu suleqataasoq Manumina Lund Jensen oqarpoq.

Qimmeq pillugu suliniut sunaana?

Qimmeq pillugu suliniut tassaavoq danskinit kalaallinillu ilisimatusaatigalugu paasissutissanillu ingerlatitseqqinnissaq siunertaralugu suliniutigineqartoq.

Suliniut Ilisimatusartunit, ilinniartunit, uumasut nakorsaanniit, qimussertartunit, ilinniartitsisunit kiisalu assiliisartunit ataatsimoorullugu suliarineqarpoq.

Kalaallit qimmiisa qimuttut sananeqaataannik kulturikkullu oqaluttuarisaanermut akuuneranik, ilisimasanik katersinerup ilisimatusaatigineqarnissaat suliniummi anguniakkat pingaarnerit ilagaat. Nunatsinnilu sukkanniuttarnerup piujuaannartinneqarnissaa suliniummi ilaatigut aamma anguniarneqarpoq.

DNA-mik misissuinermi itssarnisarsiornermilu nassaarineqartut tunngavigalugit, qimmit qimuttut pilerfiat taakkulu qangarsuaq issittumi, qimminut qimuttunut qanoq atassuteqarnerat paasiniarneqarpoq. Qimmillu qimuttut qanoq pingaaruteqarnerat qanorlu unammillernartiginerat suliniummi maluginiarneqarpoq.

Aallerfik: Københavns Universitet / Ilisimatusarfik Grønlands Univesitet

Allisiguk

Qimmit qimuttut ilisimatusaatigineqarneranni DNA-nik misissuinerit tunngavigalugit ilisimatusartut kalaallit qimmiata qimuttup Sibiriami ukiut 9.500-t matuma siorna qimmit qimuttuusimasut ilaqutarigaat, itsarnisarsiornermi assaanikkut uppernarsarneqartoq, Manumina Lund Jensenip ilanngullugu oqaluttuaraa.

Tulluusimaarutissaasoq

Qimmit qimuttut Guinness World Records 2026-mi ilanngunneqartussanngorneri oqaluttuarisaanitsinnut iluaqutaasinnaasoq aammalu takornarialerinermut soqutiginarsaaqataasinnaasoq, Manumina Lund Jensen naliliivoq.

- Qimussernermut soqutiginnittut, qimmitsinnullu aamma oqaluttuarisaanitsinnut soqutiginnittunut iluaqutaalluarsinnaavoq. Taavalu aamma nunatsinni inuit qimmitsinnut soqutiginnittut taavalu aamma ilisimatusarnermut aamma iluaqutaalluassaaq, taanna oqarpoq.

Aamma atuaruk Qimmit qimuttut pillugit: Avammut niuffataalersinnaapput

Manumina Lund Jensenilu Qimmeq Projektimut suleqataareerluni isumaqarpoq kalaallit qimmiisa rekortiliisut allattorsimaffiannut ilanngunneqalerneri tulluusimaarutissaasoq.

- Assorsuaq nuannersorujussuuvoq. Tulluusimaarutigissavarput tamatta nunatsinni. Taamatut ilanngunneqarsimammat, Manumina Lund Jensen oqarpoq.

Qimussimik sukkanniunneq Avannaata qimussersuanik taaneqartartoq Sisimiuni ukioq manna marsip 29-ani ingerlanneqassaaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.