Kalaallit pisisartut Nunatsinneersunik nerinerussapput

Kalaallit pisisartut Nunatsinneersunik nerinerussasut, suliffeqarfissuit inuussutissaarniat kissaatigaat. Tamannalu anguniarlugu inuussutissaarniat misilittakkaminnik ilisimasaminnillu avitseqatigiiffeqalerniarlutik pingasunngornermi ataatsimeersuarput.
Tasiilaq Assi © : Kim Ries Jensen
marsip 22-at 2017 16:58

- Nunatta pissarititai tamatta tulluusimaarutigalutigit atugarisarpagut, Sermersooq Business Councilip pisortaa Ulla Lynge oqarpoq.

'Kalaallit Nunaata ilisarnaataa - Issittumit inuussutissat pitsaasut' qulequtaralugu Nunatsinni inuussutissat pillugit Ilimmarfimmi ullumi ataatsimeersuartoqarpoq. 

Inuussutissalerinermik suliaqartut ilisimasaminnik misilittakkaminnillu avitseqatigiiffeqalernissaat, suliffissuillu inuussutissaarniat nerisassanik nutaalianik nunatta iluani tunisaqarnerulernissaat, aaqqissuisut neriuutigigaat Ulla Lynge oqaluttuarpoq.

Tamannalu iluatsikkumallugu inuussutissaarniat angisuut, soorlu assersuutigalugit Brugseni, KNI Royal Greenlandilu, ilisimasaminnik avitseqatigiipput.

Assersuutigalugu Royal Greenlandip peqataanermigut neriuutigaa, nerisassianik tunisassiarisartakkaminnik, nunani allani tunilluartakkaminnik, nunatsinni tunisaqarnerusinaalissallutik. 

- Nunani allani pisisarneq eqqarsaatigalugu Nunatsinni annikinnerusumik tunisaqartarpugut. Taamaakkaluartoq ineriartortitsineq ingerlakkusullutigu maani peqataavugut taavalu Nunatsinni tunisaqarneq annertunerusumik aallukkusullutigu maani peqataavugut, Royal Greenlandimi tuniniaanermi ingerlatsisoq, Malik Hegelund Olsen, oqarpoq.

Nunatsinnilu tunisaqarnerunissaq anguniarlugu Royal Greenlandip nunatsinni pisisartut ujartugaannik aalajangersimasunik tunisaqarnerulerusupput.

- Soorlu sukkanerusumik pisariinnerusumillu iganeqarsinnaasut piumaneqarnerusut maluginiarparput.

Royal Greenlandip pingaartumik Brugseni, Pisiffik Pilersuisorlu suleqatigalugit igaat uunnariaannaat qanoq ittut kalaallit pilerigineraat misissoraa, Malik Hegelund Olsen aamma oqarpoq.

- Nunatsinni pissarititagut, immamiittut nunamiittullu, uumasut naatitallu misissornissaat soqutiginarpoq, Royal Greenlandimi tuniniaanermi ingerlatsisoq, Malik Hegelund Olsen, oqarpoq.

Ataatsimeersuarneq inuussutissarsiornikkut attaveqaqatigiiffiup, Arctic Business Networkip, aaqqissuuppaa.