Nunatsinni nerisassianik ineriartortitsineq sammineqalersoq
Inuussutissarsiornikkut attaveqaqatigiiffiup Arctic Business Networkip ataatsimeersuartitsinissaq aaqqissuussaraa, Kalaallit Nunaannilu nerisassanut sammisaqarfimmi ilisimatusarnerullu silarsuaani inuussutissarsiornermilu ilisimasalinnik katersissalluni.
Saqqummiussat assigiinngitsut, suleqatigiinnernillu, tamarmik isummersuinissamik siunertaqartut Kalaallit Nunaanni nerisassat annertunerusumik pingaartillugit iliuuseqartoqarnissaanik, nunagisamilu tuniniaavimmi avammullu tuniniagassanik ataatsimeersuarnermi sammineqassapput.
Kalaallit Nunaanni Brugseni, Royal Arctic Line, Sermersooq Business Council Arctic Importilu suleqatigalugit Arctic Business Network ataatsimeersuartitsivoq.
Arctic Importip pisortaata Allan Frostip ataatsimeersuartitsinissaq periarfissanik ammaassiuffiussasoq neriuutigaa:
- Angorusupparput, ataatsimeersuarneq ineriartornermi alloriarnerussasoq siulleq, siuariartornerup ineriartornissaannik tunngaviliisoq, Allan Frost oqarpoq.
Inuussutissarsiornerup aaqqissuussaanerani siuariartornermut akornutaasinnaasut suussusersineqarnissaat pingaaruteqartoq Allan Frostip oqaatigaa, EU-mut Danmarkimullu eqqussinissamut maleruagassat sakkortuut pilersitsisunut amerlasuunut annertuumik akimmiuffiusinnaammata, taanna oqarpoq.
