Nunat Avannarliit Siunnersuisoqatigiivisa nersornaasiinerat: Kalaallit nersornaatisimasortaqanngillat

Nunani Avannarlerni Nersornaasiuttakkamik Norgemi Oslomi ippassaq agguaassisoqarmat Kalaallit Nunaat nersornaatisisunut ilaanngilaq.

Nersornaasiuttakkat tallimat ukiut tamaasa agguaanneqartarput.

Nunat Avannarliit Siunnersuisoqatigiivisa ukiumoortumik ataatsimiinneranni nersornaasiineq pisarpoq. Atuakkiaq, filmiliaq, avatangiisit pillugit suliniarneq, nipilersorneq erinarsornerlu aamma meeqqanut inuusuttunullu atuakkiaq akissarsitinneqartarput. Sammisanut tamanut innersuunneqartut kalaalersaqarput.

Ajugaasunullu ilaavoq Danmarkimi filmiliaq "Viften". Arlarsaat - imminut allamilluunniiit suialaarfiginnninniarluni tigummiartagaq.

Danmarkip nunasiaatigisimasaani Indiap kippasissuani qeqertani 1848-mi pisimasuutitaavoq.

Naliliisartut ilaatigut filmiliortut tassaanerarpaat ammip qalipaataanik immikkoortitsinermik nunasiaateqartullu imminnut naalagarsuartut inissittarnerannik sapiissuseqarlutik takutitsisut:

- Oqaluttuarisaaneq alakkarterpaat isigisarlu kusananngeqaaq." "Viften" tassaavoq Danmarkip oqaluttuarisaanerani pisimasoq immikkuullarilluinnartoq aammali tassaalluni ullutsinni oqallisigineqartartunut nuanrsuarmilu isiginiarneqartunut tunngasoq, naliliisut oqarput.

Erinarsortartoq talliortorlu Finlandimiu Maija Kauhanen nipilersornermut atatillugu ajugaavoq, nunatsinneersoq SIGU ajugaanngitsoorluni.

Kalaaleq meeqqanut atuakkiortartoq eqqumiitsuliortoq, Naja Rosing-Asvid, meeqqanut inuusuttunullu atuakkiortumut nersornaasiuttakkamut innersuunneqarpoq. Ajugaasuuvorli Islandimiup atuakkia Eldgos, Rán Flygenringip pinngortitap inummut sunniuteqartarneranik assiliartalersorlugu atuakkiaa.

Avatangiisinik eriaginnittutut akissarsisinneqartoq tassaavoq, Sverigemi suliffeqarfik. Annoraamerngit igiinnarnagit atoqqillugit sanaartorfiusoq.

Nuummi atoqqiinermik suliffeqarfik Pikumini innersuunneqaraluarpoq.

Atuakkiortumut nersornaat Sverigemeersumut allamut tunniunneqarpoq, Joanna Rubin Dranger - ”Husk os til live”.

Kalaaleq atuakkiortoq, Katrine Rasmussen Kielsen, "Qivittuissuit akornanniinnikuuvunga" innersuussanut ilaavoq.

Ajugaasut tamarmik arsarnertut ilusilimmik "Nordlys"-mik tammajuitsussarsipput 300.000 danske kroruuninik aningaasartaqartumik.