Nipilersortartunut nersornaat: Nipilersoqatigiit SIGU oqaluttuarisaanermut allannguisinnaasut

- SIGU nunani avannarlerni nipini alutornartuni nutaavoq.

Kalaallit nipilersoqatigiit SIGU-kkut Nunani Avannarlerni Siunnersuisoqatigiit Nipilersortartunut nersornaasiuttagaannut sooq ukioq manna innersuunneqarnerat taama aallartippoq.

Nersornaaserneqartoq aqagu Oslomi Operami saqqummiunneqarpat, nersornaaserneqartoq innersuunneqartunit katillugit 13-init ajugaasuussaaq, tamannalu 300.000 koruuninik aningaasartaqarpoq.

- Nuanneqaaq, tulluusimaarnaqaaq, suliara taamani saqqummiussara naleqartinneqarluarsimammat suli siornali saqqummeraluartoq. Aamma nunarput sinnerlugu taamannak toqqagaanera innersuussaanera tulluusimaarutigivara, nipilersoqatigiit siuttuat, Johannes Sigurdsen Københavnip Mittarfianit Oslomut timmisartoqqinnissaminut utaqqisoq oqarpoq.

SIGU nersornaaserneqassagaluaruni tamanna tupaallannartuussaaq. Nipilersortartunummi nersornaat 1965-imili tunniunneqartalermalli nunatsinneersunut nersornaasiisoqarnikuunngilaq.

Nipilersoqatigiillu siuttuata taaguutertik taaneqassagaluarpat qanoq qisuariassanerluni naluaa:

- Naluara piareersarsarnikuunngilangaluunniit, naatsorsuutiginngeruttorakku tassami annertungaarmat innersuunneqartut allat 12-13. Periarfissat annikitsutut isigaakka, kisianni nalunaqaaq, soorunami pissanganalaarpoq. Imannak naatsorsuuteqarujussuanngikkaluarpunga.

Nipilersorneq ilaajunaannartoq

SIGU siullermik 2021-mi saqqummeqqaarpoq.

Tamatuma kingorna ”Ujartaraat Qaamaneq” qulinik immikkoortulik saqqummersinneqarpoq, arlalinnik ilaatigut Sisimiuni Arctic Soundsimi siorna tusarnaartitsisoqarpoq, SIGU-lu Koda Awards 2023-mi ilaatigut innersuunneqarluni, Naja P-li ajugaavoq.

Nipilersoqatigiit maanna innersuunneqaqqipput, innersuunneqarnerilu tamarmik nipilersoqatigiinnik samminnerulerfiusarpoq:

- Annertusoq malunnarpoq, mailikkut allagarseqattaaginnaavippunga susoqassanersoq, uani susoqassava, uanigooq piffissaq. Norgemi danskit ambassadøriata neriartoqquaatigut, uanigooq piffissaq qaaqqusaavugut uanigooq naapisimaarluta ilasseqatigiitta, tusagassiortut aajuku immikkut attavigisarpaatigut, Johannes Sigurdsen oqarpoq.

Nipilersorneq Johannes Sigurdsenip meeraaneraniilli inuunerani ilaangaatsiarsimavoq. Taannami inuiaat qitittaasiannik ilitsoqqussaqarluni peroriartorpoq, ukiukitsunnguullunilu pattagiartalerluni.

Johannes Sigurdsen ullumikkut 31-nik ukioqarpoq, ullormullu eqqumanermi annerpaartaa nipilersuutilerinermut suli atortarpaa.

Nipilersortuni erinarsortuunerup saniatigut taanna Nuummi nipilersornermik ilinnairfimmi nipilersortitsisuullunilu ilinniartitsisuuvoq.

SIGU Nunani Avannarlerni Siunnersuisoqatigiit nipilersortartunut 2023-mi nersornaasiineranni aqagu ajugaassagaluarpat ajugaassanngikkaluarpalluunniit nipilersoqatigiit siunissaanut pilersaaruteqareerpoq:

- Eqqaaginnarsinnaavara soorlu Pink Floyditupajaaq filmiliaat musikalsk soundtrackipajaaq taamaattumik nunatsinni immiussititsiniarlunga aappaagu eqqarsarpunga, Johannes Sigurdsen oqarpoq.

Nersornaasiineq NRK-kkut aamma Norden.org-ikkut isiginnaarneqarsinnaavoq.